Zaj nyeem hnub tim 27 lub 7 hli 2023 (Daily reflection)

ZAJ NYEEM HNUB TIM 27 LUB 7 HLI, HNUB TSIB LUB LIS PIAM 16 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 13: 10-17)

Kwv tij Hmoob, Huab Tais Yes Xus tau hais ib zaj paj lug txog tus neeg tawm mus tseb nplej rau hauv ib daim teb, mas cov nplej tuaj thiab loj hlob txi txiv raws li cov av uas cov noob nplej poob rau. Ces cov thwj tim thiaj nug Huab Tais Yes Xus tias ua cas nws tsis hais qhia ncaj kiag rau sawv daws, pheej yuav hais ua paj lug dab tsi, vim tias thaum Huab Tais Yes Xus hais ua paj lug mas sawv daws yuav tsis to taub lub ntsiab zoo.
Kwv tij, muaj tseeb li cov thwj tim hais tiag! Peb cov laus neeg thaum lawv yuav ntuas peb los yog hais ib lo lus tseem ceeb muaj qab hau rau sawv daws, mas lawv nyiam ua paj lug hais. Peb cov mloog ib txhia kuj to taub, ib txhia kuj tsis to taub.
Tus yuav to taub zoo, mas yog tus cuab pob ntseg mloog, qhib siab txais lo lus ntawd, nws khaws cov paj lug coj mus xav mas nws thiaj yuav to taub. Tus neeg muaj pob ntseg tab sis nws tsis muab siab rau mloog, mas nws zoo li tus lag ntseg, nws yuav tsis tau dab tsi li.
Yog li Huab Tais Yes Xus thiaj hais tias “Nej qhov muag tau txoj hmoov zoo, vim nej qhov muag pom kev. Nej pob ntseg tau txoj hmoov zoo, vim nej pob ntseg hnov lus.”
Kwv tij, peb yuav ua li cas peb qhov muag thiab pob ntseg thiaj yuav tau txoj hmoov zoo, peb lub tswv yim thiaj yuav to taub Huab Tais Yes Xus cov paj lug?
Nej coj lub Moo Zoo hauv hnub no mus xav mog.
Nyob zoo sawv daws.