Zaj nyeem hnub tim 28 lub 10 hli 2023 (Daily reflection)

ZAJ NYEEM HNUB TIM 28 LUB 10 HLI, HNUB UA HMOOV LEEJ NTSHIAB XIS MOOS THIAB YUS DAS

COV LUS NYOB HAUV LUS KAS NTAWV MOO ZOO (LK 6: 12-19)

Cov kws tij Hmoob, hnub no peb ua hmoov Leej Ntshiab Xis Moos thiab Yus Das, nkawd yog Huab Tais Yes Xus thwj tim, yog cov Hauv Paus Xa Lus.

Nyob hauv Ntawv Moo Zoo hu ‘Xis Moos’ ua ‘tus siab kub’, vim ntau zaus cov neeg kheev hu nws yuam thiab xav tias nws yog Xis Moos Pob Zeb. Tos lawv hu Xis Moos ua tus siab kub, vim nws yog ib tug His Xas Lais uas hwm Tswv Ntuj zoo thiab muaj Tswv Ntuj ua tus pov hwm, thiab vim Xis Moos lub siab kub lug hais txog kev tiv cov Los Mas. 

Xis Moos tau nrog Yus Das mus tshaj lub Moo Zoo txog Pes Xis teb. Nyob ntawd Xis Moos txaus siab rau lawv xuas kaw los kaw nws tuag, vim li ntawd qhov peb pom tseeb tias yog Xis Moos tus siab kub mas yog ib rab kaw thiab phau Ntawv Ntshiab. 

Ntawm Yus Das mas Mas Tais thiab Mas Kos hu nws ua ‘Thas Des As’ yog xeem lus As Las Mais. Tos nkawd hu li ntawd vim nkawd xav hu Yus Das lub npe kom txhob thooj li Yus Das Kas Lis Yaus lub npe.

Yus Das yog Mab Liab thiab Yos Xes cov xeeb ntxwv, yog Huab Tais Yes Xus ib tug txheeb kwv tij, nws tseem yog Yas Kos tus kwv thiab. Yus Das tau mus tshaj lub Moo Zoo txog cov teb chaws Pes Xis. Nws raug hmuv nkaug tuag ua tim khawv, vim li ntawd, Yus Das daim duab thiaj yog tuav ib rab hmuv muaj ib rab taus. 

Kwv tij, Huab Tais Yes Xus 12 tug Hauv Paus Xa Lus, lawv tsis sib thooj, lawv nyias muaj nyias ib lub tswv yim, nyias muaj nyias kev xav; tab sis tos lawv nyob ua ke tau vim lawv puav leej saib Huab Tais Yes Xus ua qhov loj. Nyob hauv peb pawg ntseeg zoo li ntawd, peb tsum saib Huab Tais Yes Xus yog qhov tseem ceeb, mas peb thiaj yuav muaj kev sib haum tau.

Nyob zoo sawv daws.