Zaj nyeem hnub tim 28 lub 11 hlis 2023 (Daily reflection)

ZAJ NYEEM HNUB TIM 28 LUB 11 HLIS, HNUB PEB LUB LIS PIAM 34 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 5-11)

Kwv tij Hmoob sawv daws, nyob hauv tsoom Hmoob mas thaum lawv yuav hais ib cov lus tseem ceeb, lawv yuav ua paj lug hais, ntawm cov neeg paub qab hau mas lawv yuav hais ib cov lus zoo li yog lus saub. Huab Tais Yes Xus cov lus hnub no yog zoo li ntawd. Huab Tais Yes Xus muab neeg piv rau lub Tuam Tsev Teev Ntuj.
Nyob rau lub zim txwv ntawd, lub Tuam Tsev Teev Ntuj zoo nkauj kawg, tas cov neeg Yus Das puav leej qhuas tias tsis muaj ib lub Tuam Tsev nyob hauv ntiaj teb no yuav zoo nkauj cuag lub Tuam Tsev Teev Ntuj nyob hauv lub tsheej Yes Lus Xas Les. Cov thwj tim kuj hais zoo li ntawd. Huab Tais Yes Xus hais ib cov lus los piv rau neeg tias zoo li lub Tuam Tsev Teev Ntuj, sawv daws tu zam zoo nkauj, sawv daws tu lub cev kom zoo saib; tab sis muaj ib hnub lub cev no yuav tuag thiab lwj mus ua av, tsis tshuav ib yam nyob ntxiv. 
Kwv tij Hmoob, cov thwj tim xav tias Huab Tais Yes Xus tab tom ua Yaj Saub hais txog yav tom ntej lub Tuam Tsev Teev Ntuj yuav raug rhuav, lawv thiaj nug tias yog thaum twg. Huab Tais Yes Xus tsis teb dab tsi, nws tsuas ntuas lawv kom ceev faj txog cov neeg yuav tuaj ua kom lawv yuam kev. 
Kwv tij, Huab Tais Yes Xus tsis xav kom peb hnov luag tej hais txog tej xwm phem hauv lub ntiaj teb no, ces ua rau peb suav hnub suav hmo, peb muab tas lub siab los xav txog tej ntawd ces peb tsis nco qab txog qhov tseeb tias txhua tus neej muaj ib hnub yeej yuav ploj mus, tab sis neeg tus ntsuj plig yuav nyob mus li.
Kwv tij Hmoob, peb paub li ntawd lawm, peb yuav muab siab rau ua cov hauj lwm sib nyiam sib hlub, rau siab tsim koob hmoov, mas txhua hnub peb thiaj yuav tsis txhawj txhog hnub kawg hauv peb txoj sia. Nyob zoo sawv daws.