Zaj nyeem hnub tim 28 lub 2 hlis 2023 (Daily reflection)

ZAJ NYEEM HNUB TIM 28 LUB 2 HLIS, HNUB PEB LUB LIS PIAM 1 CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 6: 7-15)

Kwv tij Hmoob, nag hmo peb hais tias peb yuav teev thiab thov Ntuj pab peb kom pom txog cov neeg txom nyem, cov pluag, cov tos kev hlub ntawm peb. 
Hnub no, Huab Tais Yes Xus qhia peb tias thaum peb teev Ntuj, peb txhob ua xws li cov neeg tsis tau ntseeg.
Yog peb saib txog peb Hmoob xwb, peb yuav pom tias yav thaud peb tseem coj kev cai dab qhuas, thaum peb teev dab mas peb yuav fiv ntuj fiv teb, fiv dab vaj dab tsev, dab toj roob hauv pes txhua yam kom tau raws li siab ntshaw, ces peb yuav pauj rau, los tej zaus mas peb ntaus kuam yuam kom dab yuav raws li peb lub siab xav, peb ntuas mus mus los los kom dab yeem peb, ces peb thiaj yuav zoo siab.
Kwv tij, Huab Tais Yes Xus hais kom peb tsis txhob ua zoo li ntawd, thaum peb teev Ntuj thiab thov txog Tswv Ntuj. Peb txhob yuam Tswv Ntuj, txhob ntuas ntau ntau, txhob taij tas zog kom Tswv Ntuj ua raws li peb txoj kev ntshaw.
Huab Tais Yes Xus “Nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nej Txiv twb xub paub lawm.”
Yog li thaum peb teev Ntuj, peb thiaj yuav ua zoo li ib tug tub mloog mloog lus, yuav cuab ntsej zoo mloog saib Tswv Ntuj uas yog peb Txiv yuav hais dab tsi rau peb, peb yuav tso siab tias Tswv Ntuj yog peb Txiv mas nws yuav muab yam zoo tshaj rau peb, tsuav yog peb ua siab ntev tos.
Kwv tij, Tswv Ntuj yog peb Txiv tiag, nws hlub peb txhua tus, yog li ua ntej Tswv Ntuj yuav pub raws li peb thov mas Tswv Ntuj xav kom peb ua siab dav thiab huv txaus, peb yuav tau rho qhov phem tawm hauv peb siab tso. 
Peb yuav rho qhov phem tawm hauv peb tau, mas yog kom peb nyiam lwm tus, kom peb zam rau cov neeg ua tsis zoo rau peb, rau peb tus yeeb ncuab.
Nyob zoo sawv daws.