Zaj nyeem hnub tim 28 lub 7 hli 2023 (Daily reflection)

ZAJ NYEEM HNUB TIM 28 LUB 7 HLI, HNUB RAU LUB LIS PIAM 16 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 13: 18-23)

Cov kwv tij Hmoob, lub Moo Zoo hnub no yog cov lus Huab Tais Yes Xus txhais zaj paj lug ‘tseb nplej’ rau cov thwj tim mloog. Yog nej nco tau mas nag hmo cov thwj tim nug Huab Tais Yes Xus tias tim li cas nws thiaj ua paj lug hais rau tsoom sid, ces Huab Tais Yes Xus teb lawv tias yog vim Ntuj tsis pub kom lawv paub tej yam tob hauv Ntuj lub Ceeb Tsheej, cov yuav paub tau kawg yog cov nrog Huab Tais Yes Xus nyob xwb, lawv thiaj yuav to taub.
Kwv tij, Huab Tais Yes Xus twb txhais ntxaws ntxaws rau peb to taub txog zaj paj lug tseb nplej lawm. Peb paub lawm tias cov noob nplej yog tam li Tswv Ntuj Lo Lus, cov av hauv daim teb yog cov neeg tau hnov Tswv Ntuj Lo Lus. 
Huab Tais Yes Xus hais tias muaj 4 pab neeg: pab neeg ua tsis kam qhib siab rau mloog Tswv Ntuj Lo Lus, pab neeg mloog tab sis tsis coj mus xav thiab ua raws, pab neeg mloog tab sis lawv ua siab fab xav txog lwm yam ntau, thiab pab neeg muab siab rau mloog; lawv coj mus xav thiab ua raws Tswv Ntuj Lo Lus.
Tus neeg twg, nws tau hnov los yog tau nyeem Tswv Ntuj Lo Lus hauv Ntawv Ntshiab, nws tsis coj cov lus ntawd mus xav, nws yog zoo li cov av tom tej ntug kev uas tawv tawv cov noob nrhau cag tsis tau rau hauv nws nruab siab.
Kwv tij, yog peb tsis xav ua tus neeg zoo li no, mas thaum peb hnov los tau nyeem Tswv Ntuj Lo Lus, peb yuav coj los xav saib lo lus ntawd ntuas peb siab zoo li cas, Huab Tais Tswv Ntuj hais dab tsi rau peb.
Tus twg thaum nws hnov, nws mloog tab sis nws mloog tsis tom thawj, nws xav tab sis nws tsis coj mus ua raws, nws tsis rov muab lo lus ntawd los ntuas siab mas nws zoo li cov av pob zeb uas cov nplej tuaj tab sis cag tsis tob, ces tshav ziab nplej qhuav tuag tas. Yog peb zoo li no, peb yuav kuab siab coj Tswv Ntuj Lo Lus los ntuas siab thiab coj mus siv nyob hauv peb lub neej.
Tus nws ua siab fab, nws tau hnov tab sis nws lub siab xav txog lwm yam ntau, nws tsis muab siab dai dhuam rau Lo Lus, los tej zaus nws tseem coj Tswv Ntuj Lo Lus mus ntxeev kom haum nws lub siab ntshaw, cov neeg zoo li no yog cov av muaj pos laum tsob nplej, ces nplej tuag. Yog li yog peb paub tias peb zoo li hais, mas peb yuav hloov tus kheej cuab pob ntseg zoo zoo mloog, muab siab khi rau Tswv Ntuj Lo Lus.
Tus uas nws muab siab rau mloog los yog rau siab nyeem Tswv Ntuj Lo Lus hauv Ntawv Ntshiab, nws coj mus ntuas siab, coj muss iv nyob hauv nws lub neej, nws yog cov av zoo, Tswv Ntuj Lo Lus yuav tawg paj txi txiv nyob hauv nws. tej tus txi ntau, tej tus txi tsawg.
Kwv tij, nej coj mus xav mog. Nyob zoo sawv daws.