Zaj nyeem hnub tim 28 lub 8 hli 2023 (Daily reflection)

ZAJ NYEEM HNUB TIM 28 LUB 8 HLI, HNUB NCO TXOG LEEJ NTSHIAB AUS NKUS TIS NUS

COV LUS NYOB HAUV MAS TAIS NTAWV MOO ZOO (MT 23: 13, 15-22)

Huab Tais Yes Xus tsawm tias “Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem.”

Kwv tij Hmoob sawv daws, ua cas Huab Tais Yes Xus hais cov lus tsawm li ntawd, kuj yog vim cov Kws Ntawv Ntshiab thiab cov Fas Lis Xais yog cov paub Txoj Cai zoo dua tsoom sid, lawv qhuab qhia sawv daws txog Txoj Cai tab sis lawv tsis ua raws li lawv ntuas sawv daws, lawv zoo li tus neeg qhia tej yam yuam kev rau tsoom sid.

Kwv tij Hmoob, muab hais kom peb sawv daws to taub, mas thov muab piv rau tej xwm tshwm sim hauv peb tej zos Hmoob; xws li ob niam txiv muaj teeb meem hauv lub cuab, nkawd mus txog tus txwj laus. Nyob ntawm sawv daws xub ntiag mas tus txwj laus hais cov lus ntuas lus zoo rau nkawd kom rov mus ua neej sib hlub, tab sis tawm nraud mas nws tshum kom nkawd muaj lus sib ceg, sib nrauj, nws thiaj yuav tau mus tham luag poj niam. 

Kwv tij, nyob hauv peb cov neeg ua Ntuj kev cai, muaj ib lo lus hais tias txawm tus Txiv Plig los yog Xib Hwb tuaj nthuav Tswv Ntuj Lus rau peb nws yuav coj tus yam ntxwv tsis zoo, tsis ua cas, peb txhob saib nws tus yam ntxwv, qhov peb yuav muab siab rau yog Tswv Ntuj Lo Lus nws nthuav rau peb mloog.

Yeej yog, tab sis yog tsis tas!

Yog rau peb cov ua neeg ntseeg, tab sis tsis yog rau tus ua Txiv Plig los Xib Hwb vim nws tab tom ua zoo li cov Kws Ntawv Ntshiab thiab cov Fas Lis Xais zoo nraum daim tawv.

Kwv tij, nej muab xav saib yog nej tsis ua raws lo lus nej ntuas luag, nej puas tsim nyog yuav yog tus mus ntuas lawv?

Hnub no thiaj xav kom peb sawv daws, tsis hais koj, los kuv; peb yuav thov Tswv Ntuj xa Leej Ntuj Plig tuaj kaj peb lub siab, kom peb pom tias niaj hnub peb puas ua raws li Tswv Ntuj Lo Lus tuaj txog peb.

Nyob zoo sawv daws.