Zaj nyeem hnub tim 29 lub 6 hlis 2023 (Daily reflection)

ZAJ NYEEM HNUB TIM 29 LUB 6 HLIS, HNUB TSIB LUB LIS PIAM 12 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 7: 21-29)

Cov kwv tij, lub Moo Zoo hnub no kuj yog txuas zaj nag hmo. Nag hmo Huab Tais Yes Xus hais txog cov yaj saub cuav, mas peb nthuav tias tus yaj saub cuav tsis yog leej twg, tiam sis yog tus neeg ntseeg txog Yes Xus tab sis nws tsis coj raws lub Moo Zoo.
Hnub no, Huab Tais Yes Xus thiaj hais tias “Tus yuav tau mus hauv Tswv Ntuj lub Ceeb Tsheej tsis yog tus paub kuv, tsis yog tus tau hais txog kuv. Tus yuav tau mus hauv Tswv Ntuj lub Ceeb Tsheej yog tus ua raws li Huab Tais Tswv Ntuj lub siab nyiam.”
Kwv tij, tus ua raws Huab Tais Tswv Ntuj lub siab nyiam, yog tus tau hnov Huab Tais Yes Xus lo lus tas, nws khaws coj mus ua raws; yog nyiam thiab hlub sawv daws.
Cov kwv tij Hmoob, tus hais ntawm ncauj tab sis tsis nqes tes ua, nws yuav muaj qab hau tau li cas. Tus niaj hnub musk oom lub txoos txi Ntuj, niaj hnub teev Ntuj tab sis nws tsis hloov siab tshiab tsis ntxuav nws kom huv, nws yuav tau mus hauv Tswv Ntuj lub Ceeb Tsheej tau li cas.
Yog li mas cov kwv tij, peb ntseeg txog Yes Xus lawm, peb coj Ntuj kev cai lawm, tsim nyog peb yuav tau ua raws li Tswv Ntuj txoj cai yog kub siab teev Ntuj thiab rau siab ntso hlub ib tsoom neeg. 
Nyob zoo sawv daws.