Zaj nyeem hnub tim 29 lub 8 hli 2023 (Daily reflection)

ZAJ NYEEM HNUB TIM 29 LUB 8 HLI, HNUB NCO TXOG LEEJ NTSHIAB ZAM NTXUAV PLIG RAUG TXIAV CAJ DAB

COV LUS NYOB HAUV MAS KOS NTAWV MOO ZOO (MK 6: 17-29)

Kwv tij Hmoob, hnub no yog hnub peb cov neeg ua Ntuj kev cai yuav nco txog tus ntxuav plig Zam raug tus vaj Hes Los txiav caj dab, yog li mas lub Koom Txoos thiaj xaiv zaj lus hauv Mas Kos Ntawv Moo Zoo piav txog thaum lawv muab Zam tua coj los rau sawv daws tau mloog, tau xav tswv yim.

Mas Kos piav tias thaum Hes Los hnov Zam cov lus ntuas nws kom txhob mus nqaws nws tus niam tij los ua poj niam, mas Hes Los paub tias Zam hais yog kawg, ces Hes Los hwm Zam thiab nyiam mloog Zam cov lus tab sis vim nws tso tej yam yuam kev tsis tau mas Hes Los thiaj ntxhov siab tas zog.

Kwv tij, thaum peb qhuab ntuas ib tus neeg kom hloov siab tshiab, los yog tshaj lub Moo Zoo rau luag tej, mas yeej tsis nkim zog dag, txawm tias tsis tsheej xeeb tuaj rau peb pom, tsis kav cov lus ntawd yuav maj mam tuaj cag nyob hauv tus neeg mloog peb cov lus lub siab. Ib yam li luag tej niaj txis piv lus tias “Lub teev dej niaj hnub nrog rau daim lag zeb, daim lag zeb yeej yuav nrwb taus pleb.”

Kwv tij, tsuav yog kom peb ua tiag, txhob maj qaug zog, txhob maj tso tes khiav; mas muaj ib hnub lo lus yuav hloov tus neeg ntawd lub siab kom nws thim xav tau.

Yog peb mloog Txiv Plig Nyiaj Pov cov lus piav txog thaum nws tuaj tshaj Ntuj kev cai rau peb haiv Hmoob mas peb yuav pom tias yog ib yam nyuaj kawg nkaus. Txiv Plig Nyiaj Pov tsis paub ib lo lus Hmoob, tsis paub Hmoob kev kev cai, tsis paub Hmoob tej kev ntseeg. Ces Txiv Plig Nyiaj Pov tau hais ib yam yuam kev ua rau Hmoob tsis kam ntseeg Ntuj, tsis kav Txiv Plig Nyiaj Pov ua ib siab nrog Hmoob nyobm kawm Hmoob lus, kawm Hmoob tej txuj; Txiv Plig muab kev nyiam kev hlub ua lub teeb tsom coj Txiv Plig kev. 

Txiv Plig Nyiaj Pov mus nrog Hmoob nyob, tshaj Ntuj Lus rau Hmoob 4 xyoos nkaus thiaj mam muaj thawj tug Hmoob txais Cim Ntxuav. 

Kwv tij, yog hnub ntawd Txiv Plig tso tes, tso kev tshaj Ntuj Lus rau Hmoob tseg, mas xyov txog thaum twg thiaj muaj cov ua Ntuj kev cai nyob hauv lub Koom Txoos Kav Tos Liv li niaj hnub no.

Nyob zoo sawv daws.