Zaj nyeem hnub tim 3 lub 10 hli 2023 (Daily reflection)

ZAJ NYEEM HNUB TIM 3 LUB 10 HLI, HNUB PEB LUB LIS PIAM 26 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 9: 51-56)

Kwv tij Hmoob sawv daws, cov His Xas Lais nyob Nkas Lis Lais, yog thaum lawv yuav nqes mus pem lub tsheej Yes Lus Xas Les nyob Yus Das teb, lawv yuav tsum hla Xas Mas Lias teb, los sis lawv tsum taug tus dej Yos Los Das mus rau Yes Lis Kos thiaj mam mus txog lub tsheej Yes Lus Xas Les. 
Cov His Xas Lais tsis tsuj Xas Mas Lias teb ua ntej lawv yuav mus ua lub ntees Hla, vim lawv hais tias Xas Mas Lias teb yog lub teb chaws tsis huv.
Nyob hauv Ntawv Moo Zoo, peb pom tias thaum Huab Tais Yes Xus thiab cov thwj tim yuav mus pem Yes Lus Xas Les, lawv tsis hla Xas Mas Lias teb. Tsuas yog thaum rov qab, lawv thiaj nkag los hauv Xas Mas Lias, ces thiaj ntsib tus poj niam tuaj nqa dej ntawm Yas Kos lub qhov dej. Thaum ntawd, cov Xas Mas Lias txais Huab Tais Yes Xus thiab lawv ntseeg txog Huab Tais Yes Xus.
Hnub no, Huab Tais Yes Xus tab meeg mus hauv Xas Mas Lias. Tab sis cov neeg nyob thaj tsam ntawd tsis kam txais Huab Tais Yes Xus thiab cov thwj tim. Tos lawv tsis kam txais, vim Huab Tais Yes Xus yuav hla mus pem Yes Lus Xas Les, tsis yog yuav koom nrog lawv ua lub ntees nyob saum lub roob hauv lawv lub teb chaws.
Kwv tij, thaum Zam thiab Yas Kos pom tias cov neeg hauv Xas Mas Lias teb tsis txais lawv, mas nkawd npau taws, nkawd xav muab lub teb chaws Xas Mas Lias rhuav pov tseg.
Kwv tij Hmoob, thaum peb ntuas ib tug neeg txhaum kom tig los yuav lub siab tshiab, thaum peb pab ib tug neeg yuam kev kom rov los taug qhov ncaj; tab sis nws tsis mloog, nws tsis yuav peb hais, mas nyaj tej zaus peb yuav npau taws yuav chim rau nws xws li Yas Kos thiab Zam npau taws rau cov Xas Mas Lias.
Tab sis Tswv Ntuj siab zoo, Tswv Ntuj tsis npau taws rau lawv. Tswv Ntuj ua siab ntev tos saib lawv puas hloov siab. Tswv Ntuj yuav muab txim rau tus paub Tswv Ntuj tab sis nws tsis muaj lub siab nyiam lwm tus.
Kwv tij, hnub no Huab Tais Yes Xus qhia peb tias txawm luag tej tsis kam mloog peb hais, tsis kam txais peb; los peb txhob chim rau luag.
Nyob zoo sawv daws.