Zaj nyeem hnub tim 3 lub 11 hlis 2023 (Daily reflection)

ZAJ NYEEM HNUB TIM 3 LUB 11 HLIS, HNUB NCO TXOG LEEJ NTSHIAB MAS TIS NUS DES POS LES

COV LUS NYOB HAUV LUS KAS NTAWV MOO ZOO (LK 14: 1-6)

Kwv tij Hmoob sawv daws, yog nco tau mas nyob hauv Hnub Ob lub Lis Piam no peb nthuav lub Moo Zoo hais txog Huab Tais Yes Xus kho tus poj niam khoov cev kom rov sawv taus ntseg nyob hauv Hnub Xas Npas Tos, ces Huab Tais Yes Xus tsawm cov neeg nyob ntawd tias lawv hais tias hnub caiv tsis pub ua hauj lwm kho tus neeg raug mob tab sis ua cas lawv ho lawv cov tsiaj mus noj zaub haus dej tau. Hnub no Huab Tais Yes Xus rov qab tsawm lawv dua tias “Nyob hauv Hnub Xas Npas Tos uas nej sawv daws caiv no, yog nej ib tug tub los ib tug nyuj poob hauv lub qhov tim thaj, nej puas yuav mus pab rub tawm los.”

Kwv tij, yog thaum peb tsa ib txoj cai los ib tsab cai twg coj los siv, mas peb yuav tau siv kom xws tib yam, tsis yog siv rau luag thiab peb tsis sib xws. Peb siv rau luag li cas, mas thaum txog peb kuj yuav siv zoo li ntawd. Yog peb ua tsis tau mas txhob yuam kom luag ua zoo li peb hais. Tshwj xeeb mas yog thaum ib tug neeg twg hla txoj cai kom tau ua hauj lwm zoo pab lwm tus.

Huab Tais Yes Xus tsis xav kom peb ua zoo li ntawd.

Kwv tij Hmoob, ntseeg tau tias nyob hauv nej tej zej zos mas yeej muaj zoo li hais tiag. Thaum ib tug pej xeem tsis muaj tsim dab tsi ua ib yam txhaum mas sawv daws yuav muab txim rau nws; yog ib tug neeg txom txom nyem raug plaub ntug, mas tas zej zos tsis muaj tus tuwg xav cev tes pab. Tab sis yog thaum ib tug tub nom ua txhaum, tsis muaj leej twg muaj cuab kav txiav txim rau nws; thaum ib tug neej muaj meej mom suab npe ncha hais ib los, mas tas lub zos txhua tus raus tes pab. Peb txhob ua zoo li ntawd.

Tus hlob tus yau, tus muaj los pluag, tus nom los tus qhev; peb yuav tau saib loj sib txig, peb yuav hlub thiab nyiam xws tib yam. Peb txhob xaiv pab tus no tseg tus tod.

Nyob zoo sawv daws.