Zaj nyeem hnub tim 3 lub 3 hlis 2023 (Daily reflection)

ZAJ NYEEM HNUB TIM 3 LUB 3 HLIS, HNUB RAU LUB LIS PIAM 1 CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 5: 20-26)

Kwv tij Hmoob, Huab Tais Yes Xus xav kom cov neeg mloog nws coj tau ib lub neej ntsiab dua cov Fas Lis Xais, mas Huab Tais Yes Xus thiaj qhia nws cov thwj tim kom txhob npau taws rau lawv cov kwv tij, txhob hais lus phem rau lawv cov kwv tij, txhob cem lawv cov kwv tij tias ‘niag ruag’, los ‘niag vwm’, vim cov lus no yog cov lus phem lus iab hiam neeg. Cov thwj tim yuav txawj zam txim rau lwm tus thiab nrov mus nrog lwm tus sib raug zoo. 
Huab Tais Yes Xus hais tias “Thaum koj cev ib co txim saum lub thaj txi Ntuj, yog koj nco dheev tias koj tus kwv tau muaj lus rau koj lawm. Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim.”
Dua ntawd, Huab Tais Yes Xus ntuas lawv ntxiv kom coj lub neej nyiam ua neeg me, paub yam zoo thiab phem.
Cov lus no, thaud yog Huab Tais Yes Xus hais rau cov raws nws qab, mloog nws lus. Niaj hnub no peb twb yog cov ntawd, yog cov tab tom mloog Huab Tais Yes Xus lus, yog li cov lus no thiaj yog Huab Tais Yes Xus tab tom hais rau peb.
Yog li mas thov kom hnub no peb kav tsij ua xws li cov lus peb tau hnov no mog.
Nyob zoo sawv daws.