Zaj nyeem hnub tim 3 lub 8 hli 2023 (Daily reflection)1 aug vdo web

ZAJ NYEEM HNUB TIM 3 LUB 8 HLI, HNUB TSIB LUB LIS PIAM 17 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 13: 47-53)

Kwv tij Hmoob, nyob hauv lub lis piam no peb tau hnov Huab Tais Yes Xus hais txog Tswv Ntuj lub Ceeb Tsheej, los yog Ntuj lub Ceeb Tsheej 5 lwm. Ntuj lub Ceeb Tsheej zoo li ib lub noob zaub roj, Ntuj lub Ceeb Tsheej zoo li ib co poov xab, Ntuj lub Ceeb Tsheej zoo li tus neeg tseb cov noob nplej rau hauv nws daim teb, Ntuj lub Ceeb Tsheej zoo li ib hub nyiaj faus hauv ib daim teb, thiab Ntuj lub Ceeb Tsheej zoo li lub hlaws npliaj dej zoo nkauj.
Hnub no peb rov qab tau mloog Huab Tais Yes Xus ib dua tias Ntuj lub Ceeb Tsheej zoo li ib lub vas puav ntses.
Thaum Huab Tais Yes Xus hais txog Ntuj lub Ceeb Tsheej, mas Huab Tais Yes Xus kuj tau hais txog lub zim txwv kawg thiab.
Huab Tais Yes Xus hais tias nyob rau hnub kawg ntawd, Tswv Ntuj cov Tshiab yuav tuaj muab ib cov pov rau hauv qhov hluav taws, cov ntawd yuav quaj tom hniav nkawv.
Kwv tij Hmoob, peb ntseeg tias lub zim txwv ntiaj teb kawg muaj 2 lwm: thawj lwm yog thaum peb tus plig tso peb lub cev tseg, yog thaum peb tuag ntawd; lwm 2 yog thaum lub Moo Zoo ri mus thoob qab ntuj khwb no, ces yuav tsis muaj lub ntiaj teb ntxiv. Thaum txog lub zim txwv kawg ntawd, Huab Tais Yes Xus yuav nqes los txiav txim rau neeg raws li neeg cov hauj lwm thaum tseem ua neej nyob. 
Tus coj lub neej raws nraim Huab Tais Yes Xus cov lus qhia, nws yuav ua cov hauj lwm sis nyiam sis hlub, nws tau mus nyob pem Ntuj lub Ceeb Tsheej. Tus tsis mloog Huab Tais Yes Xus lus, nws tsis txawj hlub tsis txawj nyiam cov nyob puag ncig, nws yuav mus nyob hauv lub qhov hluav taws cig tsis txawj kug mus li.
Peb cov ua Ntuj kev cai ntseeg li ntawd.
Peb ntseeg txawv thaum tseem ua qub kev cai coj dab qhuas. Yog li thiaj yog ib yam ceeb laj qhia kom peb cov kwv tij Hmoob tseem coj qub kev cai to taub txog qhov no. Txawm li ntawd los xij, peb txhob tso peb cov kwv tij Hmoob coj qub kev cai pov tseg mog, peb txhob thuam txhob txiav txim rau lawv. Qhov peb yuav ua tau mas yog ua tus piv txwv zoo rau lawv, nyiam lawv, hlub lawv thiab thov Ntuj rau lawv raws li Huab Tais Yes Xus tau hais rau peb. Vim tias peb sawv daws puav leej zoo li cov ntses nyob hauv dej ntuj, tus xaiv yuav tus ntses twg tsis yuav tus ntses twg, mas kawg yog tus puav ntses xwb, tus ntawd yog Tswv Ntuj.
Nyob zoo sawv daws.