Zaj nyeem hnub tim 30 lub 10 hli 2023 (Daily reflection)

ZAJ NYEEM HNUB TIM 30 LUB 10 HLI, HNUB OB LUB LIS PIAM 30 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 13: 10-17)

Kwv tij Hmoob sawv daws, niaj hnub no peb pom tej xov xwm los yog pom ntawm peb qhov muag tias cov neeg muaj lub siab zoo mas lawv tsis muaj cuab kav ua qhov zoo nyob ntawm sawv daws xub ntiag, vim tias thaum tus neeg siab zoo ua qhov zoo mas tas sawv daws tsis tshua pom zoo, sawv daws saib tus neeg ua qhov zoo ntawd xws li ib tug neeg txawv. Piv li muaj ib tug neeg pw tom tej tog kev, mas sawv daws hla kev mus mus los los, tsis kav tsis muaj tus twg mus xauj tus neeg pw ntawd saib nws nyob zoo li cas. Piv li ib tug neeg dig muag nrog sawv daws hla kev, mas tsis muaj leej twg cev tes mus pab tuav nws hla kev.

Cov kwv tij, tsis yog lub ntuj nyem no muaj neeg phem ntau dua neeg zoo, tiam sis tos zoo li hais vim neeg zoo tsis kam ua pov thawj txog qhov zoo.

Hnub no, Huab Tais Yes Xus thiaj ua piv txwv rau peb pom tias peb cov neeg tig los yuav lub siab tshiab raws Huab Tais Yes Xus qab, mas peb yuav tsum ua zoo li cas.

Huab Tais Yes Xus pom tus poj niam khoov duav, Huab Tais Yes Xus kho kom nws rov sawv ntseg taus. Huab Tais Yes Xus tsawm cov neeg nyob ntawd tias “Nej txhua leej nyob ntawm no, ua cas Hnaub Xas Npas Tos nej cab nej cov tsiaj mus noj zaub haus dej, tab sis ua cas nej tsis daws tus neeg mob kom dim kev txom nyem mas!”

Kwv tij Hmoob, Huab Tais Yes Xus xav ntuas peb kom txhob saib txog yus tus kheej xwb, peb yuav tau saib txog cov neeg nyob ib ncig peb thiab, peb txhob ntshai tsam thaum ua qhov zoo ces yuav tau kev txaj muag, yuav raug lwm tus saib txawv txawv, tab sis kom peb tab meeg ua qhov zoo pab lwm tus, kom peb muaj cuab kav ua qhov zoo nyob ntawm sawv daws xub ntiag, txhob ntshai ua qhov zoo.

Cov kwv tij, xav kom nej nco Huab Tais Yes Xus lo lus tias “Tus twg lees paub kuv nyob ntawm sawv daws xub ntiag, mas kuv yuav lees paub nws nyob ntawm Leej Txiv xub ntiag.” 

Nyob zoo sawv daws.