ZAJ NYEEM HNUB TIM 30 LUB 4 HLIS 2020

Lis Piam 3 Caij Hla.
Cov mov pub txoj sia yog Yes Xus. (Z 6 : 44-50)
Yes Xus hais rau lawv tias : “Tsis muaj leej twg tuaj cuag kuv tau, yog Leej Txiv uas xa kuv tuaj tsis rub nws los. Hos kuv, mas Hnub Kawg, kuv yuav tsa nws sawv rov qab los. Cov Yaj Saub Phau Ntawv sau hais tias: Tswv Ntuj yuav qhia sawv daws huv tib si.
Tus twg hnov Leej Txiv lub suab thiab txais nws lo lus qhia, mas tus ntawd tuaj cuag kuv. Tsis muaj leej twg tau pom Leej Txiv. Tsuas yog tus tuaj ntawm Tswv Ntuj tuaj thiaj tau pom Leej Txiv. 
Kuv hais qhov muaj tseeb tiag rau nej : Tus ntseeg, nws muaj txoj sia nyob mus li.
Kuv yog cov mov muaj txoj sia. Nej cov yawg koob tau noj cov mov mas nas hauv teb chaws suab puam, tab sis lawv tuag tas lawm. Cov mov nqes saum ntuj los yog zoo li no : tus noj cov mov no, nws tsis tuag.”