Zaj nyeem hnub tim 30 lub 5 hlis 2023 (Daily reflection)

ZAJ NYEEM HNUB TIM 30 LUB 5 HLIS, HNUB PEB LUB LIS PIAM 8 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 10: 28-31)

Cov kwv tij, muaj ib hnub ib tug nplua nuj tuaj nug Yes Xus tias nws yuav ua li cas thiaj tau txais txoj sia nyob mus li, Yes Xus txawm teb rau nws kom mus muab nws lub cuab tam muag coj los faib rau cov neeg pluag, ces nws los raws Yes Xus.
Thaum Pob Zeb hnov Yes Xus cov lus ntawd, Pob Zeb thiaj nug Yes Xus tias “Xib Hwb, ntawm peb cov nrog koj nyob no, peb tso ib puas tsav yam tseg, thiab peb kuj tau los raws koj lawm, peb puas yuav tau dab tsi?”
Yes Xus thiaj teb rau Pob Zeb tias “Yog nej tso tas lub cuab tam, nej los raws kuv mas nej yeej yuav tau txais lub cuab tam tshiab ntau dua qhov nej tso tseg, thiab nej kuj yuav ntsib kev raug hiam thiab, tab sis thaum kawg, nej yuav txais txoj sia nyob mus li.”
Kwv tij Hmoob, Huab Tais Yes Xus twb tuaj qhia kom peb sis nyiam sis hlub li ib cuab kwv tij, es ua cas lub Moo Zoo hnub no Yes Xus ho hais kom peb tso peb tej vaj tse, kwv tij nkauj muam, niam thiab txiv tseg?
Huab Tais Yes Xus hais kom peb tso, tsis yog hais kom peb tsis txhob hlub. Huab Tais Yes Xus twb hais tias “Nej tso tej ntawd tseg vim kuv thiab vim lub Moo Zoo.” Huab Tais Yes Xus twb yog kev sis nyiam sis hlub, lub Moo Zoo twb yog tshaj txog txoj kev sis nyiam sis hlub. Li ntawd, Huab Tais Yes Xus cov lus no thiaj yog kom peb muab peb txoj kev nyiam coj mus hlub mus nyiam lwm tus, tsis yog tshwj cia rau peb tsev neeg xwb. Peb tsev neeg tsis yog cov koom tib plab yug, tsis yog koom tib tug dab qhuas, tsis yog koom tib lub xeem. Peb tsev neeg yog tas nrho neeg ntiaj teb, tsis hais tus muaj los tus pluag, tus zoo los phem, tus hlub peb los ntxub peb. 
Peb pub rau cov hauv peb tsev, mas peb yuav cev rau cov sab nraud thiab.
Lub Moo Zoo lub ntsiab hauv hnub no yog li no. Nyob zoo sawv daws.