Zaj nyeem hnub tim 30 lub 6 hlis 2023 (Daily reflection)

ZAJ NYEEM HNUB TIM 30 LUB 6 HLIS, HNUB NCO TXOG COV TIM KHAWV NYOB LOS MAS
COV LUS NYOB HAUV MAS TAIS NTAWV MOO ZOO (MT 8: 1-4)

Cov kwv tij, lub Moo Zoo piav tias tom qab Huab Tais Yes Xus qhia sawv daws txog Tswv Ntuj Lo Lus nyob saum roob tas, nws nqes los ces muaj ib tug neeg mob ruas txav los thov Huab Tais Yes Xus tias “Huab Tais, yog koj xav mas koj ua kom kuv rov zoo ntawm kuv tus mob ruas mas.” Huab Tais Yes Xus pom tias tus neeg mob ruas muaj lub siab xav kom nws rov zoo ces Huab Tais Yes Xus thiaj cev tes mus kov nws thiab hais tias “Kuv xav kom koj lub cev rov huv tuaj.” Hais tas mas tus mob ruas cia li zoo hlo tawm sim ntawd.
Kwv tij, raws Mais Xes txoj cai mas lawv saib tias cov neeg mob ruas yog cov neeg muaj txhaum loj, yog Tswv Ntuj rau txim rau nws. Tus mob ruas kov yam twg, chwv leej twg, mas tus ntawd kuj yuav muaj txhaum thiab. Yog li mas cov His Xas Lais thiaj tsis kheev cov neeg mob ruas nrog lawv nyob koom zos, cov neeg mob ruas tsum tawm mus nyob ua ke rau tej qhov chaw deb tsoom sid. Tsis muaj tus twg yuav quav ntsej txog cov neeg mob ruas, yuav mus fim lawv, nug lawv moo, nrog lawv tham pem, los yog pab lawv.
Ntshai tus mob ruas yuav xav ntau heev ua ntej nws yuav tsa ncauj thov Huab Tais Yes Xus kho nws. Tab sis muaj ib yam peb pom, mas yog tus mob ruas ntawd yeej muaj ib lub siab xav kom Huab Tais Yes Xus pab nws tiag tiag, nws tsis xav txom nyem zoo li ntawd ntxiv lawm. Nws thiaj ua tiag thov saib Huab Tais Yes Xus puas kam pab nws.
Yog peb muab tus mob ruas no los piv rau peb, mas peb yuav pom tias peb cov txhaum ua rau peb muaj mob, peb raug peb cov txhaum ua lub nras tsuam peb cia. Li ntawd, peb puas xav tshem lub nras no tawm, peb puas xav yaug peb lub siab kom rov huv dua tuaj. Yog peb tu siab thiab xav hloov siab tshiab tiag tiag mas peb yuav hais rau Huab Tais Yes Xus tias “Huab Tais, yog koj xav mas thov koj pab cawm kuv kom huv tuaj zoo li koj pab tus mob ruas thiab yuad.”
Ces Huab Tais Yes Xus yuav cev tes kov peb thiab hais rau peb tias “Kuv xav, koj lub siab rov huv tuaj mas”, thiab yuav hais rau peb tias “Koj mus cev koj lub siab ua paj tshab rau Tswv Ntuj, thiab koj siv koj lub neej ua puav pheej rau luag pom tias koj hloov siab tshiab lawm tiag; yog koj ua neej nyob hauv kev nyiam, kev hlub, kev ncaj thiab kev kaj.”
Nyob zoo sawv daws.