Zaj nyeem hnub tim 30 lub 8 hli 2023 (Daily reflection)

ZAJ NYEEM HNUB TIM 30 LUB 8 HLI, HNUB PLAUB LUB LIS PIAM 21 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 23: 27-32)

Kwv tij Hmoob sawv daws, Huab Tais Yes Xus tsawm cov Kws Ntawv Ntshiab thiab cov Fas Lis Xais vim nyob hauv lawv mas muaj ib txhia yog cov neeg dag; lawv ua rau sawv daws pom tias lawv yog cov coj Txoj Cai nruj tab sis qhov tiag nyob hauv lawv nruab siab tsis muaj txoj cai, lawv qhia sawv daws ua qhov zoo tab sis lawv ho tsis ua li lawv cov lus qhia, lawv yog neeg dag siab, yog neeg zoo nraum daim tawv tab sis lawv lub siab lwj ua kas, lawv lub siab tsis xav li lawv lub ncauj.

Kwv tij, nyob hauv Ntawv Moo Zoo nthuav rau peb paub tias ‘tus neeg zoo nraum daiv tawv’ los yog tus neeg ‘xav ib yam hais dua lwm yam’ mas yog cov neeg muaj tus yam ntxwv zoo li no: tuaj sab nraud saib zoo li lawv yog neeg ncaj, lawv nyiam ua rau sawv daws pom kom tau lo lus qhuas ntawm sawv daws, lawv nyiam ntuas sawv daws tab sis lawv tsis tig rov los kho lawv, lawv nyiam muab neeg tej kev cai los rhuav Tswv Ntuj lo lus, lawv lub siab nyob deb Tswv Ntuj, lawv muab tej yam tsis muaj qab hau saib tseem ceeb dua Huab Tais Txoj Cai, thiab lawv tsuas ntsia pom tias lawv ncaj dua sawv daws.

Kwv tij Hmoob, muaj ib zaug Vaj Qhia Fas Ntshis Kus tau ntuas cov neeg ntseeg hauv lub Koom Txoos tias “Peb sawv daws puav leej yog neeg muaj txhaum, tab sis peb yuav nquag thov Huab Tais Tswv Ntuj pab peb kom txhob ua tus neeg zoo nraum daim tawv, vim tus neeg zoo nraum daim tawv mas lawv tsis paub txoj kev sib zam txim, lawv tsis paub txoj kev zoo siab, thiab lawv tsis paub Tswv Ntuj kev nyiam kev hlub.”

Yog li ntawd, cov neeg zoo nraum daim tawv thiaj tau txoj hmoov phem raws li Huab Tais Yes Xus tau tsawm lawv.

Kwv tij, peb yuav tig rov los ua zoo xav saib nyob hauv peb, peb puas muaj tus yam ntxwv xws li tau hais los no, thiab peb yuav niaj hnub thov Huab Tais Tswv Ntuj pab kom peb txhob ua tus neeg zoo nraum daim tawv mog. 

Nyob zoo sawv daws.