Zaj nyeem hnub tim 31 lub 10 hli 2023 (Daily reflection)

ZAJ NYEEM HNUB TIM 31 LUB 10 HLI, HNUB PEB LUB LIS PIAM 30 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 13: 18-21)

Kwv tij Hmoob, Tswv Ntuj lub Ceeb Tsheej yog zoo li cas? Hnub no Huab Tais Yes Xus thiaj muab Tswv Ntuj lub Ceeb Tsheej piv rau lub noob zaub roj thiab cov poov xab.

Lub noob zaub roj, mas tej zaus peb cov Hmoob tsis tau pom ces peb tsis to taub tias yog zoo li cas. Tab sis poov xab mas peb yeej paub txog.

Kwv tij, piv li tsob ntoo faj khuam lub noob me tshaj lwm yam ntoo, tab sis loj tuaj ua tsob ntoo loj thiab siab dua lwm cov ntoo. Tsob ntoo faj khuam loj thiab siab ntawd ua chaw rau cov noog tau nkaum tau ua zes. Lub poov xab me me yog thaum muab xyaw cov hmoov nplej lawm, cov hmoov nplej yuav ntsu tuaj tau ntau thoob ntxiv, mas peb thiaj yuav coj mus puab ua tau ntau lub ncuav.

Kwv tij, Huab Tais Yes Xus xav qhia peb tias Tswv Ntuj lub Ceeb Tsheej yog pib ntawm cov hauj lwm me me tab sis thaum kawg yuav txia ua ib yam loj thiab muaj txiaj ntsim rau coob leej. Tswv Ntuj lub Ceeb Tsheej pib ntawm tej yam neeg xav tias tsis tseem ceeb tab sis qhov kawg muaj qab hau rau sawv daws.

Kwv tij, peb yuav ua li cas kom tej yam hauj lwm me me sawv daws ntsia tsis muaj qab hau, yuav txia ua qhov loj thiab tseem ceeb rau sawv daws tau?

Yog peb muab ua zoo xav, peb yuav pom tias tib neeg ua dab tsi mas tib neeg yeej muaj lub siab ntseeg tias yam neeg ua ntawd yuav tsheej xeeb tuaj, yog li neeg thiaj muaj kev vam khom txog cov hauj lwm neeg nqes tes ua. Thaum peb cog nplej mas peb yeej vam khom tias lub xyoo no peb yuav sau tau ib txhab nplej; thaum peb cog dib peb kuj vam khom tias yuav tau cov dib qab zib. Peb vam khom raws li peb ntseeg. Peb ntseeg li ntawd, peb thiaj muaj kev vam khom.

Kwv tij, peb ntseeg tias peb cog nplej mas yuav tau nplej, peb vam khom tias yuav tau nplej txaus noj thawm xyoo. Tab sis muaj ntau yam peb tsis paub; cov noob nplej ntawd yuav tuaj los tsis tuaj, tsob nplej puas yuav huam, nplej puas yuav puv hnab los tsis puv.

Yog li mas txij hnub cog mus txog hnub sau, peb thiaj yuav tsum nquag tawm rooj mus xyuas daim teb, mus tu kom txhob fab, nrhiav chiv rau kom nplej huam, mas thiaj yuav tau nplej raws li xav. 

Li ntawd, peb cov hauj lwm me me tab sis peb ntseeg tias yuav pab ntau coob leej ntau tus thiab yog cov hauj lwm xis Tswv Ntuj siab, mas peb yuav tsum muab siab rau ua, rau siab tiag tiag, txog tog txhob tso test sum, txhob maj tag kev cia siab thiab vam khom.

Kwv tij Hmoob, nyob hauv txog kev ntseeg mas peb kuj yuav ua zoo li ntawd thiab, mas txoj kev ntseeg no thiaj yuav txi txiv tau.

Nyob zoo sawv daws.