Zaj nyeem hnub tim 31 lub 8 hli 2023 (Daily reflection)

ZAJ NYEEM HNUB TIM 31 LUB 8 HLI, HNUB TSIB LUB LIS PIAM 21 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 24: 42-51)

Kwv tij Hmoob sawv daws, lub Moo Zoo hnub no peb hnov Huab Tais Yes Xus hais tias “Tus tub txib pheej xeeb thiab xyuam xim yuav tau txoj hmoov zoo, hos tus tub txib siab phem yuav raug ntiab mus nrog cov neeg zo nraum daim tawv nyob.”

Kwv tij, nag hmo peb hais tias cov neeg zoo nraum daim tawv, mas lawv hais ib yam tab sis lawv ua lwm yam, lawv tsis ua raws li lawv cov lus hais. Cov neeg zoo li ntawd yuav tau txoj hmoov phem.

Hnub no Huab Tais Yes Xus thiaj ntuas kom peb ua neeg pheej xeeb thiab xyuam xim.

Kwv tij, lo lus ‘pheej xeeb’ txhais tias ‘siab ncaj’, tus neeg pheej xeeb thiaj yog tus neeg siab ncaj, los yog tus neeg ncaj nceeg.

Huab Tais Yes Xus hais tias tus neeg pheej xeeb, mas nws yuav ‘zov hmo’. Lo lus no txhais tau tias tus neeg siab ncaj nws yuav ua raws li nws lo lus hais, nws yuav ua cov hauj lwm zoo txawm tias yuav muaj neeg pom los tsis pom, nws tsis vam txog neeg tej lus qhuas lus cav txog nws.

Nyob hauv peb lub neej ua hauj lwm, mas nej yuav pom tias muaj ib txhia rau siab ntso leg nws dej num thiab kuj muaj ib txhia tub nkeeg tsis liam fab rau nws cov hauj lwm. Tab sis thaum twg tus tswv num tuaj mas nws ua tus kub siab thiab rau siab ua hauj lwm tsis so. Nws ua li ntawd kom txhob raug cem, nws ua li ntawd kom tus tswv pom tias nws yog tus neeg nquag. 

Thaum tus tswv num tuaj pom, mas tus tswv yeej qhuas nws tiag, tab sis kwv tij, nws cov hauj lwm tawm los puas yuav zoo dua tus neeg rau siab leg hauj lwm mas? Nws puas yuav ua tau li hais txhua txhia zaus mas? Yog tus tswv paub qhov tseeb lawm, tus tswv puas yuav muab paj tshab rau nws?

Kwv tij Hmoob, Huab Tais Yes Xus cov lus hauv hnub no thiaj yog ntuas peb sawv daws kom txhob ua zoo nyob ntawm sawv daws xub ntiag xwb. Tab sis peb yuav ua zoo txhua lub caij txhua lub sij hawm, thiab txhua qhov chaw.

Nyob zoo sawv daws.