Zaj nyeem hnub tim 4 lub 10 hli 2023 (Daily reflection)

ZAJ NYEEM HNUB TIM 4 LUB 10 HLI, HNUB NCO TXOG LEEJ NTSHIAB FAS NTSHIS KUS NYOB AS XIS XIS
COV LUS NYOB HAUV LUS KAS NTAWV MOO ZOO (LK 9: 57-62)

Cov kwv tij Hmoob, hnub no peb pom tias muaj 3 tug neeg tau nrog Huab Tais Yes Xus tham. Thawj tus neeg, nws tuaj hais rau Huab Tais Yes Xus tias “Huab Tais, koj mus qhov twg los kuv yuav raws koj mus.” Tus tim ob, nws hais rau Huab Tais Yes Xus tias “Huab Tais, koj hu kom kuv raws kuj mus, mas kuv yuav raws tab sis thov koj cia kuv mus faus kuv txiv tso.” Tus tim peb, nws hais tias “Huab Tais, kuv yuav raws koj mus, tab sis thov koj cia kuv rov mus hais ib lo lus ncaim tseg rau kuv tsev neeg tso.”
Kwv tij, nyob hauv peb mas yuav muaj zoo li 3 tus neeg no tiag. Qee tus neeg lawv muaj lub siab xav raws Huab Tais Yes Xus qab, qee tus mas Huab Tais Yes Xus hu lawv tab sis lawv tseem ua xyem xyav, los lawv yig; vim tias neeg txoj cai muab lawv khi cia, los yog txoj hauj lwm ua rau lawv tso siab tsis tas rau kev raws Huab Tais Yes Xus.
Huab Tais Yes Xus hais rau lawv 3 tug ntawd tias “Hma muaj qhov nkaug, niig muaj zes pw, tab sis Neeg Leej Tub tsis muaj chaw rau ncoo. Koj cia cov tuag faus cov neeg tuag mas, koj kav tsij mus tshaj Tswv Ntuj lub Ceeb Tsheej. Leej twg tuav rab khais lawm, nws tseem tig ntsia tom qab, mas nws tsis phim Tswv Ntuj lub Ceeb Tsheej.”
Cov kwv tij, Huab Tais Yes Xus 3 lo lus no txhais tias tus twg xav raws Huab Tais Yes Xus, mas nws yuav zoo siab txais txoj kev txom nyem yuav tuaj raug nws. tus twg tshaj txog Tswv Ntuj lub Ceeb Tsheej, mas nws tab tom tshaj txog lub neej tshiab tom qab txoj kev tuag, nws yog tus coj txoj sia nyob mus li mus tseb rau lwm tus neeg. Tus twg yog nws tau tuav Tswv Ntuj txoj hauj lwm lawm, nws yuav tsis txhob muab tso pov tseg, txawm tias yuav muaj ntau yam ua rau nws ntxhov siab.
Kwv tij, hnub no peb nco txog Leej Ntshiab Fas Ntshis Kus, nws yog tus piv txwv tsom txog Tswv Ntuj Lo Lus hauv hnub no. 
Fas Ntshis Kus yog ib tug tub nyob hauv yim neeg nplua nuj, nws zoo siab tso tas ib puas tsav yam tseg kom tau raws Huab Tais Yes Xus qab. Fas Ntshis Kus coj lub neej thov khawv thiab tshaj lub Moo Zoo rau cov neeg pluag, nws kub siab ua txoj hauj lwm tshaj Ntuj Lus txawm tias qhov kawg nws lub qhov muag tsis pom kev, nws saib txoj kev tuag zoo li yog neeg tus muam. Leej Ntshiab Fas Ntshis Kus thiaj yog tus rov txhim tsa Yes Xus lub Koom Txoos tshiab. 
Nyob zoo sawv daws.