Zaj nyeem hnub tim 4 lub 11 hlis 2023 (Daily reflection)

ZAJ NYEEM HNUB TIM 4 LUB 11 HLIS, HNUB NCO TXOG LEEJ NTSHIAB SAS NPOS LOS MES OS

COV LUS NYOB HAUV LUS KAS NTAWV MOO ZOO (LK 14: 1,7-11)

Cov kwv tij Hmoob, peb sawv daws tsis hais koj los kuv, mas peb yeej xav kom zeej tsoom saib taus peb, saib peb yog ib tug neeg muaj tsim muaj qab hau rau ntawm sawv daws. Tab sis hnub no Huab Tais Yes Xus xav qhia rau peb kom xyaum ua neeg me mas luag thiaj yuav saib taus peb. Huab Tais Yes Xus hais tias thaum luag caw koj musk oom ib lub rooj qav, mas koj txhob ua tus tsab muaj plhus mus zaum qhov chaw luag npaj tseg rau lwm tus, tsam ib me ntsis tus ntawd tuaj ces luag yuav hais koj mus zaum lwm qhov chaw, ces koj yuav txaj muag. Tab sis koj yuav ua tus neeg me zaum kom deb, mas thaum luag hu koj los zaum qhov ze, koj thiaj yuav tau ntsej muag ntawm sawv daws.

Kwv tij, tus neeg coj tus yam ntxwv me xwb, mas luag tej thiaj saib nws muaj tsim. Tus neeg nws tsis tsa nws cai, mas sawv daws thiaj saib taus nws.

Tus neeg me thiab tsis tsa nws cai loj dua lwm tus, mas nws yuav luag ntxhi thiab hais lus zoo rau sawv daws, nws zoo siab nrog sawv daws tham, tsob hwb sawv daws. 

Kwv tij, xav kom peb ua li no nyob hauv peb cov tsev txoos. Thaum peb pom ib tug neeg chaws los hauv lub tsev teev Ntuj, txawm paub los tsis paub nws, txawm txheeb los tsis txheeb peb, mas xav kom peb luag ntxhi txais nws, nrog nws tham, pub chaw rau nws zaum, los yog nrhiav chaw rau nws tau zaum. Peb txhob ua dub muag txig rau tus ntawd. 

Ib qho tuag, cov kwv tij, peb tsum tau xyaum tiag tiag, kom tus yam ntxwv ntawd yog tawm hauv peb lub siab nyiam los, tsis yog lam ua kom tau ntsej muag xwb, nyob tsam peb txia ua tus zoo nraum daim tawv xwb mog.

Nyob zoo sawv daws.