Zaj nyeem hnub tim 4 lub 12 hlis 2023 (Daily reflection)

ZAJ NYEEM HNUB TIM 4 LUB 12 HLIS, HNUB NCO TXOG LEEJ NTSHIAB ZAM NYOB DAS MAS
COV LUS NYOB HAUV MAS TAIS NTAWV MOO ZOO (MT 8: 5-11)
Kwv tij Hmoob sawv daws, hnub no nej hnov tus xab txheeb hais rau Huab Tais Yes Xus tias “Huab Tais, kuv tsis tsim nyog koj chaws los hauv kuv tsev, tsuav yog koj hais ib lo lus xwb, ces kuv tus tub txib yuav zoo hlo.”
Huab Tais Yes Xus thiaj hais rau cov thwj tim tias “Kuv tsis tau pom ib tug neeg ntseeg npaum li ntawd hauv cov His Xas Lais.”
Kwv tij, tus xab txheeb cov lus ntawd, tsom txog nws lub siab tias nws tso siab thiab ntseeg tias Huab Tais Yes Xus muaj hwj chim cawm tau nws tus tub txib kom zoo tiag.
Nyob hauv lub Moo Zoo hnub no, peb tseem paub ntxiv tias tus xab txheeb no tus tub txib zoo tam sim ntawd tuaj tiag.
Lub Moo Zoo hnub no thiaj qhia peb tias tus neeg twg ua neeg me thov Ntuj nyob hauv kev tso siab thiab nws muaj lub siab ntseeg Ntuj tiag, mas nws yuav tau txais li yam nws thov.
Ntawm peb, peb puas tso siab thiab muaj lub ntseeg txog Tswv Ntuj, los peb lam tso siab thiab lam ntseeg raws li lwm tus qhia rau peb xwb.
Cov kwv tij, lub lis piam no yog thawj lub lis piam hauv lub caij tos Huab Tais, mas xav kom peb rov tig los soj hauv peb nruab siab, saib peb txoj kev ntseeg loj li cas, peb txoj kev ntseeg tseem ruaj khov los yog twb pob tas lawm.
Peb soj txog peb txoj kev ntseeg tas, mas peb yuav hais tias “Huab Tais, kuv tsis tsim nyog txais koj tuaj hauv kuv vaj tse, thov koj hais ib lo, mas kuv lub siab yuav zoo hlo.”
Nyob zoo sawv daws.