Zaj nyeem hnub tim 4 lub 8 hli 2023 (Daily reflection)1 aug vdo web

ZAJ NYEEM HNUB TIM 4 LUB 7 HLI, HNUB NCO TXOG LEEJ NTSHIAB ZAM VIAS NES
COV LUS NYOB HAUV MAS TAIS NTAWV MOO ZOO (MT 13: 54-58)

Cov kwv tij Hmoob, hnub no lub Moo Zoo hais tias cov neeg hauv Nas Xas Les tsis ntseeg Huab Tais Yes Xus. lawv twb tau hnov hais txog Huab Tais Yes Xus cov hauj lwm nws ua los cawm cov neeg muaj mob, twb hnov luag tej cav tias Huab Tais Yes Xus yog tus ‘Mes Xias’ los yog ‘Tswv Ntuj tus Pleev’ tuaj cawm cov His Xas Lais, tab sis ua cas lawv ho tsis ntseeg?
Kwv tij, cov neeg nyob Nas Xas Les lawv ib txhij pom Huab Tais Yes Xus puag thaum me me los, lawv pom tias Huab Tais Yes Xus loj tuaj zoo li cas, mas lawv thiaj xav tias lawv yog cov paub Huab Tais Yes Xus zoo dua lwm pab lwm pawg. Yog tiag, lawv yeej paub Huab Tais Yes Xus zoo kawg, tiam sis lawv tsis to taub Huab Tais Yes Xus zoo vim qhov lawv paub ua rau lawv tsis kam qhib siab ntseeg Huab Tais Yes Xus, thiab lawv lub tswv yim qhia lawv tias tus ‘Mes Xias’ tsum yog ib tug noob nom, yog ib tug vaj, tsis yuav yog ib tug me nyuam ntsuag pluag txom nyem li tus Yes Xus lawv pom loj hlob nyob hauv lawv lub zos.
Kwv tij Hmoob, tshwj xeeb peb cov tau ua Ntuj kev cai los ntev, peb yog cov paub Huab Tais Yes Xus zoo hauj sim, peb puas muaj ib lub siab xav li cov neeg hauv Nas Xas Les. Peb puas qhib siab txais Huab Tais Yes Xus, peb puas kawm kom to taub Huab Tais Yes Xus zoo tuaj. Los yog peb xav tias ‘Kuv paub Huab Tais Yes Xus zoo lawm, kuv paub tias Huab Tais Yes Xus yog Tswv Ntuj Leej Tub, nws tuaj tshaj lub Moo Zoo 3 xyoos sib law, ces nws yeem raug cov neeg siab phem ntes mus tua saum Ntoo Cuam kom tau cawm kuv. Huab Tais Yes Xus cov lus qhia mas kuv paub zoo, yog qhia kom kuv nyiam Tswv Ntuj tib tug xwb, thiab yog kom kuv hlub sawv daws. Vim kuv twb ntseeg Ntuj tau 20, 30 xyoo, los yog tag nrho kuv ib sim neej lawm, mas kuv tsis yuav niaj hnub mus teev Ntuj, mus pab luag tej los yeej tau lawm. Tswv Ntuj yeej yuav tuaj npo kuv mus nrog nws nyob xwb.’
Kwv tij, peb puas xav li ntawd?
Nyob zoo sawv daws.