Zaj nyeem hnub tim 5 lub 10 hli 2023 (Daily reflection)

ZAJ NYEEM HNUB TIM 5 LUB 10 HLI, HNUB NCO TXOG LEEJ NTSHIAB FAUS TIS NAS
COV LUS NYOB HAUV LUS KAS NTAWV MOO ZOO (LK 10: 1-12)

Kwv tij Hmoob, yog nej nco tau mas muaj ib zaug Huab Tais Yes Xus xaiv 12 leeg hauv cov thwj tim ua ‘Hauv Paus Xa Lus’, lawv mus tshaj lub Moo Zoo rau cov zos thiab kho cov neeg mob kom zoo. Hnub no nej rov hnov Huab Tais Yes Xus xa cov thwj tim mus tshaj lub Moo Zoo, tab sis tsis yog cov Hauv Paus Xa Lus uas muaj 12 leeg. Hnub no Huab Tais Yes Xus xa 72 leeg mus. 
Zaj no qhia peb tias dhau ntawm cov Hauv Paus Xa Lus lawd, tseem muaj lwm pab thwj tim tau ua txog hauj lwm tshaj lub Moo Zoo thiab. Nyob rau lub zim txwv no, kuj yuav zoo li ntawd. Tswv Ntuj xaiv ib cov neeg los sawv cov Hauv Paus Xa Lus chaw, yog cov ua Leej Choj los peb hais tias cov Txiv Plig. Tswv Ntuj tseem hu sawv daws, tsis hais cov Tub Ntxhais Cog Lus los cov neeg ntseeg; kom los ua txoj hauj lwm tshaj lub Moo Zoo thiab. Yog li txoj hauj lwm no thiaj tsis yog cov Leej Choj thiaj yuav tsum ua xwb.
Kwv tij, qhov peb pom thiab paub mas yog cov Leej Choj lawv tshaj Tswv Ntuj Lo Lus nyob hauv lub Txoos Txi Ntuj, lawv nthuav Ntawv Ntshiab rau sawv daws mloog. Peb pom cov Leej Tij, cov Leej Phauj, los cov Xib Hwb lawv qhia Ntuj kev cai rau ib pab neeg xav kawm Ntuj kev cai. 
Feem ntau mas peb pom li ntawd. Tab sis hauv peb cov tsis tau txais lub hwj chim los yog txoj cai hauv lub Koom Txoos los, peb yuav sib pab tshaj lub Moo Zoo tau li cas?
Kwv tij Hmoob, peb yuav muab peb lub neej los ua tus piv txwv rau luag tej pom tias Tswv Ntuj kev nyiam nyob hauv peb, peb coj lub neej mus raws li Huab Tais Yes Xus tau qhia peb. Qhov ntawd, yog peb ua neej sib nyiam sib hlub, peb muaj kev khuv leej lwm tus, peb sib pab ua cov hauj lwm hlub cov neeg txom nyem, sawv daws koom ib lub siab tsob hwb Tswv Ntuj. 
Kwv tij Hmoob, peb txhob tso txoj hauj lwm tshaj lub Moo Zoo rau cov Leej Choj lawv leg xwb mog.
Ua ntej yuav xa pab 72 mus, Huab Tais Yes Xus hais rau lawv tias “Qoob loo zoo sau muaj ntau kawg, tab sis cov tub zog muaj tsawg. Nej thov tus tswv qoob kom nws xa ib co tub zog tuaj sau nws cov qoob.” Yog li hnub no, peb yuav hais zaj ‘thov kom Tswv Ntuj hu neeg tshaj Ntuj Lus’ ua ke li no tias:
“Huab Tais, koj xav cawm tas lub qab ntuj neeg, koj xav kom tas lub qab ntuj neeg tuaj tshwm txoj kev tseeb ceeb. Peb thov koj: koj xa neeg mus sau koj cov qoob loo, koj xaiv ib co neeg siab loj siab kub, ua li mas koj lub moo zoo yuav txeem mus txog plaub ceg kaum ntuj, tas txhia haiv neeg yuav paub koj uas koj yog tus Huab Tais tseem ceeb, yuav paub Yes Xus uas nws yog koj tus tub, nws yog peb tus Huab Tais Pleev, nws ua Vaj kav lub ntuj lub teb mus txog txhiab niag tim puas xyoo. Ua li.”
Nyob zoo sawv daws.