ZAJ NYEEM HNUB TIM 5 LUB 12 HLI 2020

LIS PIAM 1 CAIJ TOS HUAB TAIS XYOO B

Huab Tais Yes Xus hais tias ib tsoom peb xeem zoo li tej qoob uas tsis muaj neeg sau (MT9:35-10:5-7)

Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov.

Yes Xus thiaj hais rau nws cov thwj tim tias “Qoob loo ntau kawg, tab sis cov tub zog tsawg. Nej thov tus Tswv qoob kom nws xa ib co tub zog tuaj sau nws cov qoob.”

Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom thim. Kaum ob leeg Hauv Paus Xa Lus muaj npe li no : thawj tug, yog Xis Moos uas sawv daws hu nws ua Pob Zeb, As Nres, Xis Moos tus kwv, Yas Kos, yog Ntxes Npes Dais tus tub, Zam, Yas Kos tus kwv, Fis Lis Pos, thiab Npas Tos Los Mas Yos, Tos Mas, thiab Mas Tais, tus sau se. Yas Kos, uas yog As Fas Yos tub, Thas Dais Yos, Xis Moos, tus Ntxes Los, Yus Das Kas Lis Yaus, tus muab Yes Xus muag rau luag.

Yes Xus xa kaum ob leeg no mus tshaj lub Moo Zoo. Yes Xus hais qhia lawv tias “Nej xub mus cuag cov yaj ploj hauv haiv His Xas Lais. Thaum nej mus kev, nej ceeb toom tias Ntuj lub Ceeb Tsheej tuaj txog ze lawm. Nej kho cov mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej rov pub dawb.”