Zaj nyeem hnub tim 5 lub 12 hlis 2023 (Daily reflection)

ZAJ NYEEM HNUB TIM 5 LUB 12 HLIS, HNUB PEB LUB LIS PIAM 1 CAIJ TOS HUAB TAIS
COV LUS NYOB HAUV LUS KAS NTAWV MOO ZOO (LK 10: 21-24)
Kwv tij Hmoob, lub Moo Zoo hnub no peb yuav pom tias thaum Huab Tais Yes Xus thov Ntuj mas nws ua zoo li ib tug me nyuam yaus nrog leej txiv tham; Huab Tais Yes Xus qhib tas tas nws lub siab los piav rau Huab Tais Ntuj mloog txog yam nws tau xav txog. 
Qhov no kuj yog tus piv txwv qhia rau peb tias thaum peb thov Ntuj, peb yuav coj tus yam ntxwv zoo li cas thiaj yuav xis Tswv Ntuj siab, Tswv Ntuj thiaj yuav mloog peb zaj thov. Huab Tais Yes Xus xub pib hais tias ‘Txiv, kuv cav lus zoo txog koj, Huab Tais kav ntuj kav teb.”
Huab Tais Yes Xus hais li, tsis yog nws lam hais kom xis Huab Tais Tswv Ntuj lub siab xwb, tab sis Huab Tais Yes Xus yeej xav li ntawd rau Huab Tais Tswv Ntuj tiag.
Kwv tij, piv li peb thov nyiaj ntawm peb txiv, yog peb hais cov lus tsis zoo, tsis raug pob ntseg, mas peb txiv puas yuav pub nyiaj rau peb? Los yog peb lam hais cov lus mos lus dag xwb, mas peb txiv puas yuav paub tias peb tab tom dag kom tau txais pob nyiaj? Peb txiv yeej paub.
Li ntawd, thaum peb thov Huab Tais Tswv Ntuj, peb kuj yuav ua li ntawd thiab. Hais cov lus tawm hauv nruab siab tuaj, hais tas tas lus txhob dag.
Kwv tij Hmoob, Huab Tais Yes Xus tseem tig los hais rau cov thwj tim tias “Nej ob lub qhov muag tau txoj hmoov zoo, vim nej tau pom.”
Kwv tij, lawv tau txoj hmoov zoo vim Huab Tais Tswv Ntuj hlub lawv, mas Huab Tais Tswv Ntuj thiaj cia lawv tau pom thiab to taub txhua tsav txhua yam Huab Tais Leej Txiv tau ua nyob hauv Huab Tais Yes Xus.
Cov kwv tij, peb rov tig ntsia peb kom zoo, peb yuav pom tias Huab Tais Ntuj hlub peb npaum cas thiab khuv leej peb npaum li cas. Yog Huab Tais Ntuj tsis hlub tsis nyiam peb, mas nws puas yuav pub txoj kev ntseeg rau peb thiab nws puas yuav pub nws Leej Tub los yug tsheej neeg nyob hauv ntiaj teb no kom tau txhiv peb.
Nyob zoo sawv daws.