Zaj nyeem hnub tim 6 lub 11 hlis 2023 (Daily reflection)

ZAJ NYEEM HNUB TIM 6 LUB 11 HLIS, HNUB OB LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 12-14)

Kwv tij Hmoob sawv daws, hnub no peb hnov Huab Tais Yes Xus hais tias thaum peb ua ib roog qav noj, mas tsis yog peb yuav hu cov phooj ywg, cov kwv tij, cov neej tsa, los cov nplua nuj xwb; tab sis peb yuav tau hu cov neeg pluag, cov tu tes tu taw, cov ceg tawv, cov dig muag tuaj thiab.
Peb yuav pom tias nyob hauv peb cov Hmoob, mas Huab Tais Yes Xus cov lus no tsis tshua haum rau peb pes tsawg, vim peb cov Hmoob mas feem coob peb tsuas hu cov txheeb ze los yog cov muaj suab muaj npe tuaj koom peb rooj qav ntau xwb, peb tsis tshua nco qab txog cov neeg txom nyem, cov neeg nrug peb pes tsawg. Yog peb yim nplua nuj mas peb yim tsis hu txog lawv.
Kwv tij, qhov no tsom tau tias nyob hauv peb mas peb xaiv nyiam xaiv hlub tus yuav pauj rov rau peb tau xwb, tus twg tsis muaj txiaj ntsim los qab hau rau peb mas peb tsis nco txog nws. Qhov no tsis xis Tswv Ntuj siab nyiam.
Yog li hnub no Huab Tais Yes Xus thaij hais kom peb rov ras tias qhov Tswv Ntuj nyiam yog dab tsi.
Tswv Ntuj xav kom peb nthuav lub siab hlub neeg kom dav, nthuav kom mus deb dua peb tsev neeg, peb cov kwv tij, peb caj ces, peb tsoom phooj ywg. Tswv Ntuj xav kom peb muaj lub siab nyiam thiab hlub txhua leej txhua tus neeg, tshwj xeeb mas yog nyiam thiab hlub cov neeg uas lawv tsis muaj peev xwm yuav pauj rov tau rau yus.
Yog li Huab Tais Yes Xus thiaj ntuas kom peb hu cov neeg pluag, cov neeg txom nyem tuaj koom peb rooj qav, mas peb thiaj yuav muaj kev zoo siab vim lawv tsis muaj dab tsi pauj rov.
Huab Tais Yes Xus tsis yog qhia xwb, Huab Tais Yes Xus ua piv txwv kiag rau peb pom nyob saum tus Ntoo Cuam. Huab Tais Yes Xus yeem tuag theej peb cov txhaum, nws tsis tau hais kom peb muab txoj sia pauj rov rau nws.
Nyob hauv peb, peb yuav ua li ntawd. Nyiam thiab hlub txhua tus neeg, tsis tas yuav xav tias thaum kuv hlub nws lawm, mas nws yuav tsum hlub kuv rov; kuv pab nws lawm, nws yuav tsum pab kuv thiab.
Nyob zoo sawv daws.