Zaj nyeem hnub tim 6 lub 12 hlis 2023 (Daily reflection)

ZAJ NYEEM HNUB TIM 6 LUB 12 HLIS, HNUB NCO TXOG LEEJ NTSHIAB NIS KOS LAS
COV LUS NYOB HAUV MAS TAIS NTAWV MOO ZOO (MT 15: 29-37)
Cov kwv tij Hmoob, yog tias muaj ib hnub peb pom ib tug neeg ua tau hwj huam los kho cov neeg mob kom rov zoo hlo, mas peb yuav xav li cas? Peb yuav cav txog tus ntawd lub koob meej, los peb yuav cav txog tus pub lub hwj huam ntawd rau nws? 
Ntawv Moo Zoo qhia peb tias thaum tsoom sid pom Huab Tais Yes Xus kho tau cov neeg mob ntxiab nkeeg, mas lawv sawv daws cav txog lawv tus Tswv Ntuj lub koob meej.
Yog kawg cov kwv tij, nyob hauv peb tsoom neeg ntseeg, mas peb lees tias txhuam yam peb ua tau ntawd, tsis yog vim peb muaj peev xwm, muaj txuj ci los yog muaj hwj huam; tab sis peb paub tias muaj ib tug loj tshaj peb tau pub yam ntawd rau peb, nws siv peb ua nws cov hauj lwm xwb. Peb yuav txhob ua neeg muab hlob thiab khav theeb!
Kwv tij, peb twb paub tias tus pub rab pev xwm, pub laj lim tswv yim, pub kev txawj ntse, pub lub hwj huam rau peb yog tus loj tshaj peb, tus ntawd peb hais tias yog Huab Tais Tswv Ntuj.
Li ntawd, tsim nyog peb yuav cav txog Tswv Ntuj lub koob meej mus li.
Lub Moo Zoo hnub no hais tias Huab Tais Yes Xus pom tsoom neeg raws nws, lawv sab thiab lim lim, Huab Tais Yes Xus hlub lawv, nws thiaj ua hwj huam kom 7 lub ncuav thiab ob peb tug ntses ntsu tuaj txaus lawv noj.
Peb pom tias Huab Tais Yes Xus hlub lawv tas nrho, nws tsis pub kom cov neeg raws nws tshaib plab mus tsev.
Hnub no, peb los raws Huab Tais Yes Xus, mas Huab Tais Yes Xus kuj yuav tsis pub kom peb tshaib, kom peb sab sab thiab lim lim. Huab Tais Yes Xus yuav npo thiab cawm peb.
Nyob zoo sawv daws.