Zaj nyeem hnub tim 6 lub 3 hlis 2023 (Daily reflection)

ZAJ NYEEM HNUB TIM 6 LUB 3 HLIS, HNUB OB LUB LIS PIAM 2 CAIJ PLAUB CAUG
COV LUS NYOB HAUV LUS KAS NTAWV MOO ZOO (LK 6: 36-38)

Kwv tij Hmoob sawv daws, lub Moo Zoo hnub no mas Huab Tais Yes Xus tau hais meej kawg txog hnub Ntuj yuav txiav txim rau tas ntiaj teb neeg; hnub ntawd Tswv Ntuj yuav muab peb cov hauj lwm zoo thiab phem los luj saib peb kev ua zoo rau luag tej ntau dua, los kev ua phem yuav ntau dua, ces qhov tshuav yog qhov peb yuav tau txais.
Kwv tij, kev ua zoo yog li cas?
Hnub no Huab Tais Yes Xus qhia peb tias “Koj yuav hlub luag tej ib yam li Tswv Ntuj hlub koj, koj tsis txhob txiav thiab muab txim rau lwm tus, koj yuav zam txhaum rau tus ua txhaum koj, koj yuav pub rau tus tsis muaj.”
Kwv tij Hmoob, peb txhob xav hauv siab hais ntawm ncauj xwb, qhov tseeb mas peb tsum ua tawm los thiaj yog.
Peb Txiv nws yog Tswv Ntuj, nws twb ua rau peb pom tias nws hlub peb, nws tsis muab txim rau peb, nws zam thiab pub qhov zoo tshaj rau peb; yog yeem cia Leej Tub Twm Zeej nqes los ua neeg kom tau tuag txhov peb sawv daws hauv kev txhaum, kom peb rov mus cuag tau Tswv Ntuj tus tsim peb.
Yes Xus Pleev peb tus Huab Tais kuj ua piv txwv rau peb pom tias nws hlub thiab nyiam peb npaum cas, nws tsis yog hais ntawm ncauj los qhuab qhia sawv daws kom sib nyiam sib hlub xwb.
Nej saib mas! Thaum lawv muab Huab Tais Yes Xus dai saum tus Ntoo Cuam, nws tseem thov Ntuj zam pub rau cov neeg liam lub txim rau nws, nws thov Leej Txiv Tswv Ntuj txhob muab txim rau lawv.
Peb sawv daws, twb ntseeg Huab Tais Yes Xus, twb yog Tswv Ntuj cov me nyuad, yog li thov kom nyob hauv lub caij Plaub Caug no, peb tig los yuav siab tshiab, peb yuav tsis hais ntawm ncauj thiab xav cia hauv peb nruab siab xwb tias peb hlub lwm tus, peb nyiam lawv, peb zam txhaum rau lawv; tab sis peb yuav ua kiag cov hauj lwm pub rau lawv xws li peb Txiv thiab peb tus Huab Tais tau ua rau peb pom mog.
Nyob zoo sawv daws.