Zaj nyeem hnub tim 7 lub 11 hlis 2023 (Daily reflection)

ZAJ NYEEM HNUB TIM 7 LUB 11 HLIS, HNUB PEB LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 15-24)

Kwv tij Hmoob sawv daws, yog nej nco tau mas nyob hauv Hnub Chiv lub Lis Piam 28 caij Nyob Nruab Xyoo tas los no, peb twb tau hnov Huab Tais Yes Xus zaj paj lug hais txog tus vaj ua lub ntees tshoob rau nws tus tub, ces tus vaj hais cov tub txib mus caw sawv daws tuaj koom rooj tshoob, sawv daws yig tsis tuaj mas thaum kawg tus vaj thiaj kom cov tub txib mus txhua txoj xu ke hu cov lawv ntsib tuaj koom lub ntees tshoob. Nyob hauv zaj no mas peb hais tias lub ntees tshoob piv tau li Ntuj lub Ceeb Tsheej npaj tseg rau cov Yus Das tab sis lawv tsis kam musk oom lub ntees mas Tswv Ntuj thiaj tau hu tas tsoom neeg nyob ntiaj teb no, tsis hais haiv neeg twg kuj xij, kom lawv mus koom kev zoo siab nyob hauv Ntuj lub Ceeb Tsheej. Tab sis sawv daws yuav tau hnav tsoos tsho kom phim lub ntees tshoob.
Cov kwv tij, lub Moo Zoo hnub no yog tib zag ntawd, tab sis hnub no yog cov lus hauv Lus Kas Ntawv Moo Zoo. Hnub no peb kuj yuav nthuav kom txawv li cov lus saud.
Hnub no peb yuav saib tias ua cas cov neeg uas raug caw, lawv tsis kam mus koom rooj qav.
Cov neeg raug caw, lawv hais rau tus tuaj caw lawv tias “Kuv yuav tau ib daim teb, kuv yuav tsum mus xyuas; kuv yuav tau ib nkawg txiv nyuj, kuv yuav mus sim kuv cov nyuj; kuv nyuag qhuav yuav poj niam, kuv tuaj tsis tau.”
Yog peb muab piv rau peb lub neej, mas tej zaus yeej muaj tej tus lawv tsis xyeej zoo li ntawd tiag, lawv muaj tej yam hauj lwm ti tes ces lawv mus koom ib roog qav raws lo lus caw tsis tau. Qhov no tsis hais koj los kuv, tej zaus yeej muaj zoo li ntawd. Tab sis hnub no, tsis yog zoo li ntawd. 
Ua ntej yuav ua rooj qav, tus tswv tau ceeb toom rau sawv daws tas tias txog hnub no nws yuav npaj rooj qav loj, nws tau ceeb toom rau sawv daws ua ntej kom nyias paub npaj nyias tus kheej kom xyeej tas lawm. Thaum txog hnub ua noj, nws npaj tiav tas, nws mus caw tab sis lawv tsis kam tuaj, ces lawv lam hais li ub li no kom txhob tau mus koom, vim lawv yeej tsis xav mus. Puas yuav muaj ib tug tsis xyuas daim teb kom zoo tso mam yuav, puas yuav muaj ib tug tsis sim tus nyuj tso mam mus muas ua nws tug, puas yuav muaj ib tug caiv tsis tawm rooj thaum nws tau poj niam tshiab!
Qhov Huab Tais Yes Xus xaiv ntuas peb hauv hnub no yog zoo li no: peb txhob muab tus kheej khi rau lub cuab tam, peb txhob muab peb cov hauj lwm los khuam peb cia, peb txhob muab kev zoo siab hauv lub cuab los ua chaw xyeej kom peb tsis tau mus txais kev xyiv fab hauv Ntuj lub Ceeb Tsheej. 
Nyob zoo sawv daws.