Zaj nyeem hnub tim 7 lub 12 hlis 2023 (Daily reflection)

ZAJ NYEEM HNUB TIM 7 LUB 12 HLIS, HNUB NCO TXOG LEEJ NTSHIAB AS NPLOS XYUS
COV LUS NYOB HAUV MAS TAIS NTAWV MOO ZOO (MT 7: 21, 24-27)
Kwv tij Hmoob, tej zaum nej yuav hnov ib txhia hais tias ‘tsuav yog kuv ntseeg Tswv Ntuj xwb, ces kuv yeej yuav tau mus saum ntuj lawm, kuv tsis yuav ua cov hauj lwm sis nyiam sis hlub li.’ Los muaj tej tus hais tias ‘kuv tsis tas yuav mus teev Ntuj los yog pab luag tej yeej tau, vim kuv twb paub Huab Tais Yes Xus zoo lawm.’
Hnub no Huab Tais Yes Xus qhia peb kom txhob xav zoo li ntawd, Huab Tais Yes Xus hais tias “Tsis yog cov hu kuv ua ‘Huab Tais’ yuav tau mus hauv Ntuj Ceeb Tsheej, tab sis yog cov ua raws li kuv Txiv nyob saum ntuj lub siab nyiam, lawv thiaj yuav tau mus hauv Ntuj Ceeb Tsheej.”
Kwv tij Hmoob, vim li no lub Koom Txoos Kav Tos Liv thiaj qhia sawv daws kom ntseeg txog Huab Tais Yes Xus thiab tsum khaws Huab Tais Yes Xus cov lus coj mus siv hauv nws lub neej thiab, mas nws thiaj yuav txais Ntuj lub Ceeb Tsheej ua nws lub cuab tam.
Cov kwv tij Hmoob, tus mloog thiab ua raws li Huab Tais Yes Xus lo lus qhia, mas nws piv tau rau lub tsev muaj taw ntsa cog ruaj, ces los nag hlob muaj cua ntsawj npaum cas los lub tsev yuav tsis vau.
Kwv tij, nej txhob ntseeg xwb tab sis tsis ua raws Huab Tais Yes Xus lo lus, nej txhob hais tias nej paub Huab Tais Yes Xus xwb tab sis nej tsis kam txais Huab Tais Yes Xus los nyob hauv nej. Lub caij Tos Huab Tais no, nej yuav muab siab rau mloog Lo Lus thiab npaj siab tos txais tus me nyuam Yes Xus yuav yug los nyob hauv nej mog. 
Nyob zoo sawv daws.