Zaj nyeem hnub tim 7 lub 8 hli 2023 (Daily reflection)1 aug vdo web

ZAJ NYEEM HNUB TIM 7 LUB 8 HLI, HNUB NCO TXOG LEEJ NTSHIAB VAJ QHIA XIS TUS OB
COV LUS NYOB HAUV MAS TAIS NTAWV MOO ZOO (MT 14: 13-21)

Cov kwv tij Hmoob sawv daws, nyob hauv lub Moo Zoo nej hnov hnub no, hais tias “Yes Xus hnov li ntawd tas, nws caij nkoj mus rau ib qho chaw xu kev tsis muaj neeg nyob.”
Kwv tij, Huab Tais Yes Xus hnov dab tsi, thiaj ua rau nws mus rau ib qho chaw xu kev?
Yog Huab Tais Yes Xus hnov cov xwm tias tus vaj Hes Los ntes Zam Ntxuav Plig thiab muab Zam txiav caj dab lawm. Huab Tais Yes Xus hnov lub moo no, nws rov xav txog nws txoj kev tuag vim txoj hauj lwm ua xis Tswv Ntuj siab, ces Huab Tais Yes Xus ntxhov siab, nws thiaj nrhiav ib qho chaw xu kev tsis muaj neeg nyob kom tau thov Ntuj nrog Leej Txiv tham.
Peb paub tau li cas tias Huab Tais Yes Xus xav nrhiav chaw kom tau nrog Leej Txiv Tswv Ntuj tham?
Vim tias thaum twg Huab Tais Yes Xus yuav thov Ntuj, nws yuav mus nrhiav tej qho xu kev kom tsis muaj neeg tuaj looj koov nws lub tswv yim, nws thiaj tau zoo nrog Tswv Ntuj tham, kom rov muaj zog tuaj.
Kwv tij Hmoob, Huab Tais Yes Xus xav nyob ib leeg ntsiag to thov Ntuj, tsis kav tseem muaj ib pab neeg coob, lub Moo Zoo hais tias cov txiv neej xwb twb ze ntawm tsib txhiab leej, lawv nriav Huab Tais Yes Xus, lawv xav kom Huab Tais Yes Xus kho lawv.
Txawm tias Huab Tais Yes Xus ntxhov siab thiab xav thov Ntuj npaum cas, tsis kav nws muaj lub siab hlub sawv daws, Huab Tais Yes Xus thiaj kho lawv cov mob, thiab nthuav Ntuj kev cai rau lawv moog. Txog thaum tsaus ntuj, Huab Tais Yes Xus tseem ua hwj huam kom 5 lub ncuav mov thiab 2 tug ntses ntsu tuaj txaus lawv noj thiab.
Kwv tij Hmoob sawv daws, peb pom tias Huab Tais Yes Xus hlub peb ntiaj teb neeg npaum cas, nws ntxhov siab thiab nyuaj siab tshaj, tsis kav nws saib kev nyiam kev hlub loj dua, mas Huab Tais Yes Xus thiaj tso nws qhov ntxhov siab pov tseg, xub pab cawm sawv daws ua ntej.
Peb yuav kawm ntawm Yes Xus mog. Nyob zoo sawv daws.