Zaj nyeem hnub tim 8 lub 11 hlis 2023 (Daily reflection)

ZAJ NYEEM HNUB TIM 8 LUB 11 HLIS, HNUB PLUAB LUB LIS PIAM 31 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 14: 25-33)

Cov kwv tij Hmoob, Huab Tais Yes Xus lo lus hauv hnub no yog ib lo lus loj thiab tseem ceeb tshaj. Hnub no Huab Tais Yes Xus ntuas kom peb muab kev nyiam Tswv Ntuj saib ua qhov loj tshaj plaws, loj dua kev nyiam yus tsoom txheeb ze los yog yus rov nyiam yus. Thiab Huab Tais Yes Xus kuj tseem ntuas kom peb zoo siab ris peb tus ntoo cuam lawv Yes Xus qab.
Cov kwv tij, puas yog Huab Tais Yes Xus hais kom txhob nyiam peb cov txheeb ze xws li peb niam peb txiv, los peb cov me nyuam. Tsis yog li ntawd, Huab Tais Yes Xus qhia kom peb nyiam sawv daws li qhov qub, tab sis peb tsum paub tias tus peb yuav nyiam tshaj plaws mas yog Tswv Ntuj, peb yuav tsum muab kev nyiam Tswv Ntuj ua lub plawv hauv peb txoj kev nyiam kev hlub sawv daws, peb yuav muab kev nyiam Tswv Ntuj ua lub hauv paus nrhau peb kev nyiam luag tej, ib yam li peb cov Hmoob tseem coj qub kev cai saib tus ncej dab yog tus ncej tseem ceeb tshaj plaws hauv lub tsev.
Kwv tij Hmoob, thaum Huab Tais Yes Xus kwv tus Ntoo Cuam mus pem roob Nkos Nkos Tas, nws raug plawm, raug thuam, raug kev mob lub cev thiab lub siab; peb hais tias yog raug txom nyem. Yog li Huab Tais Yes Xus thiaj xav nug peb tias peb puas kam ris tej kev txom nyem zoo li ntawd, peb puas yeem raug plawm raug ib zeej tsoom thuam zoo li ntawd.
Yog li Huab Tais Yes Xus thiaj hais ntxiv kom peb ua tib zoo xav kom txhij kom txhua, xav tom ntej tom qab kom zoo, tsam ib me ntsis peb mus txog tog ces peb tso tes khiav, peb tso tus ntoo cuam pov tseg, mas thaum ntawd haj yam ua kev txom nyem loj rau peb.
Tab sis thov kom peb sawv daws tso siab, vim tus twg yeem ris nws tus ntoo cuam lawv Yes Xus qab, nws kev txom nyem yuav plhis ua kev zoo siab, nws kev tuag yuav txia ua kev sawv rov los, nws kuj yuav tau koom Tswv Ntuj lub koob meej xws li Huab Tais Yes Xus thiab.
Nyob zoo sawv daws.