Zaj nyeem hnub tim 8 lub 8 hli 2023 (Daily reflection)1 aug vdo web

ZAJ NYEEM HNUB TIM 8 LUB 8 HLI, HNUB NCO TXOG LEEJ NTSHIAB DOS MIS NIS
COV LUS NYOB HAUV MAS TAIS NTAWV MOO ZOO (MT 14: 22-36)

Kwv tij Hmoob sawv daws, tom qab Huab Tais Yes Xus ua kom mov ntsu tuaj rau tsoom sid noj lawm, Huab Tais Yes Xus txhib kom cov thwj tim nce nkoj mus lawm sab ntug dej tim ub. Ntawm Huab Tais Yes Xus, nws xa tsoom sid rov qab, thiab nws mus teev Ntuj saum roob. Thaum yuav kaj ntug, Huab Tais Yes Xus pom cov thwj tim tab tom raug xwv txheej nyob hauv lub nkoj nyob plawv dej ntuj, nws thiaj mus ko taw saum nplaim dej mus nrhiav cov thwj tim. Lawv pom mas lawv ntshai, lawv xav tias yog lawv pom poj ntxoog, tab sis Huab Tais Yes Xus hais tias yog nws, ces Pob Zeb thiaj thov mus saum dej ntuj mus cuag Huab Tais Yes Xus.
Kwv tij Hmoob sawv daws, nag hmo peb hais tias Huab Tais Yes Xus xav nrhiav ib lub sij hawm los teev Ntuj ntsiag ntsiag, tab sis cov neeg tuaj nrhaiv Huab Tais Yes Xus coob, ces nws hlub lawv, nws kho lawv thiab yug mov rau lawv noj. Hnub no hauv lub Moo Zoo peb rov qab pom tias thaum Huab Tais Yes Xus ua cov hauj lwm pab tsoom sid tas, nws rov qab tig los teev Ntuj.
Kwv tij, Huab Tais Yes Xus teev Ntuj, nws hais dab tsi rau Tswv Ntuj?
Peb tsis paub, tiam sis tej zaus yog nws cev cov hauj lwm hauv hnub ntawd rau Tswv Ntuj, nws cev tej kev nyuaj siab rau Tswv Ntuj vim tias Huab Tais Yes Xus poob ntsoov tias cov neeg nrhiav nws tsis yog lawv xav mloog nws cov lus, cov neeg ntawd tsuas xav nrhiav kev dim ntawm lawv lub cev kev txom nyem, xav tsa Huab Tais Yes Xus ua lawv tus vaj tawm tsam tsoom tub rog Los Mas.
Kwv tij Hmoob sawv daws, niaj hnub peb yuav kawm ntawm Huab Tais Yes Xus, peb yuav niaj zaus teev Ntuj, ua Tswv Ntuj tsaug;  cev peb cov hauj lwm rau Tswv Ntuj; piav peb kev txom nyem rau Tswv Ntuj mloog; thov Tswv Ntuj ntxiv zog rau peb, pab peb ua siab loj taug Tswv Ntuj txoj kev kom tawm thawj.
Nyob zoo sawv daws.