Zaj nyeem hnub tim 8 lub 9 hlis 2023 (Daily reflection)

ZAJ NYEEM HNUB TIM 8 LUB 9 HLI, HNUB UA HMOOV TSUJ XEEB MAB LIAB YUG LOS

COV LUS NYOB HAUV MAS TAIS NTAWV MOO ZOO (MT 1: 18-23)

Kwv tij Hmoob sawv daws, hnub no peb hais tias yog hnub ua hmoov tsuj xeeb niam Mab Liab yug. Nyob hauv Ntawv Ntshiab mas tsis tau sau piav tias niam Mab Liab yug rau lub caij twg. Tiam sis yog lub Koom Txoos saib Mab Liab yog ib tug tseem ceeb thiab phim ua tus qauv rau tsoom ntseeg sawv daws, lub Koom Txoos thiaj xav ua hmoov rau niam Mab Liab. Yuav ua rau hnub twg thiaj yuav phim? Koom Txoos thiaj tau xaiv lub caij 9 lub hlis tom qab ua hmoov hwm niam Mab Liab tsis lo neeg lub keeb txhaum los ua hnub ua hmoov tsuj xeeb niam Mab Liab yug los, mas thiaj poob rau hnub tim 8 hauv lub 9 hli, yog hnub no.

Hnub no Ntawv Moo Zoo piav tias ua ntej Yos Xes thiab Mab Liab yuav sib qaws ua ib cuab, mas Mab Liab twb xub muaj me nyuam hauv nws lub cev lawm. Yos Xes thiaj xav nrauj Mab Liab, tab sis tus Tshiab los hais qhia Yos Xes tias tsis yog neeg ua kom Mab Liab xeeb tub, tab sis tus ua kom Mab Liab muaj me nyuam mas yog Tswv Ntuj Leej Ntuj Plig. Thiab tus Tshiab tseem hais kom Yos Xes coj Mab Liab los nrog nws nyob.

Kwv tij, niam Mab Liab yog tus tau txiaj ntsim puv siab, nws yog lub ntim txais Tswv Ntuj lub txiaj ntsim cawm ntaij teb neeg. Yog li mas hnub no, peb sawv daws thiaj yuav cav txog niam Mab Liab, thiab nco txog nws lub txiaj ntsig.

Nyob zoo sawv daws.