Zaj nyeem hnub tim 9 lub 2 hlis 2023 (Daily reflection)

ZAJ NYEEM HNUB TIM 9 LUB 2 HLIS, HNUB TSIB LUB LIS PIAM 5 CAIJ NYOB NRUAB XYOO 
COV LUS NYOB HAUV MAS KOS NTAWV MOO ZOO (MK 7: 24-30)

Kwv tij Hmoob sawv daws, ib txwm los mas cov neeg His Xas Lais tsis tsham cov pej kum neeg, lawv hais tias lwm haiv neeg yog neeg txhaum. Tab sis nyob rau lub caij ntawd, muaj cov neeg pej kum tuaj ua lag luam coob nyob hauv His Xas Lais teb chaws. Ib txhia ua lag luam nplua nuj, ib txhia ua nom, ib txhia kuj pluag txom nyem.
Muaj ib hnub Huab Tais Yes Xus nyob hauv lub xeev Tws Los, txawm muaj ib tug poj niam tuaj ntsib nws. Tus poj niam no yog pej kum neeg, nws tsis yog cov Yus Das. Nws thov kom Huab Tais Yes Xus pab kho nws tus me nyuam raug dab.
Huab Tais Yes Xus xav paub saib nws hlub tus me nyuam npaum cas, Huab Tais Yes Xus thaij txhob txwm hais ib co lus saib tsis tau tus poj niam ntawd. Huab Tais Yes Xus hais tias ‘yuav muab cov me nyuam cov mov los pub me nyuam dev noj mas tsis zoo.’
Thaum tus poj niam hnov cov lus ntawd, nws tsis chim tsis npau taws rau Huab Tais Yes Xus, nws tsuas ua tib zoo hais ntxiv tias ‘Huab Tais, yog li koj hais! Tab sis cov me nyuam dev nyob hauv qab rooj, lawv noj tej tsig mov poob ntawm cov me nyuam neeg los.’
Tus poj niam lo lus no, yog nws lees tias Tswv Ntuj yog tus tswv tsev, cov Yus Das los yog His Xas Lais yog cov me nyuam neeg, hos nws uas yog pej kum neeg mas tsuas yog tus me nyuam dev xwb.
Huab Tais Yes Xus pom tias txawm nws yog lwm haiv, tsis kav nws muaj lub siab hlub nws tus me nyuam, nws tso siab rau His Xas Lais tus Tswv Ntuj tias hlub nws, ces Huab Tais Yes Xus thiaj pab kom nws tus me nyuam zoo.
Kwv tij Hmoob sawv daws, txawm peb tsis yog neeg Yus Das, tsis kav peb sawvd aws puav leej yog Tswv Ntuj me nyuam, yog li mas peb yuav ua neeg me tso siab thov Tswv Ntuj pab lwm tus xws li tus poj niam no mog. 
Nyob zoo sawv daws.