Zaj nyeem hnub tim 9 lub 3 hlis 2023 (Daily reflection)

ZAJ NYEEM HNUB TIM 9 LUB 3 HLIS, HNUB NCO TXOG LEEJ NTSHIAB FAS NTSHIS KAS HAUV LOS MAS
COV LUS NYOB HAUV LUS KAS NTAWV MOO ZOO (LK 16: 19-31)

Kwv tij Hmoob sawv daws, lub Moo Zoo hnub no Huab Tais Yes Xus hais ib zaj txog lub neej tom qab peb tso lub ntiaj teb no tseg, peb yuav mus nyob zoo li cas. Huab Tais Yes Xus muab tus nplua nuj thiab tus pluag hu ua Las Ntxas Los coj los ua piv txwv hais.
Thaum peb mloog tas, tej zaus peb yuav xav ntxiv tias tus nplua nuj nws twb tsis tau ua qhov twg tsis zoo, nws twb tsis tau ua phem qhov twg ua cas thaum tuag lawd, nws ho poob mus nyob hauv ntuj txias teb tsaus raug txom nyem, ntawm tus pluag Las Ntxas Los ua cas nws thiaj tau mus nyob nrog Has Nplas Has pem Ntuj Ceeb Tsheej. 
Puas yog Huab Tais Yes Xus hlub thiab nyiam cov neeg pluag txom nyem thiab ntxub cov neeg muaj neeg nplua nuj, es Huab Tais Yes Xus thiaj hais zoo li ntawd? Los puas yog cov txom nyem xwb thiaj yuav tau mus pem Ntuj Ceeb tsheej?
Kwv tij, lub ntsiab peb xav nthuav rau sawv daws mas yog zoo li no: tos tus nplua nuj nws lub neej tom qab tuag tas ho txom nyem nyob hauv cov hluav taws vim tias niaj hnub nws ua neej nyob, nws pom tus pluag txom nyem niaj hnub tuaj nyob ze ntawm nws lub rooj mov, nws muaj noj muaj haus, nws noj tsau hnav sov tab sis nws tsis muaj lub siab hlub tus pluag txom nyem, nws tsis cev ib pluag zoo rau rau tus pluag tau noj tsau, nws tsis pub ib lub tsho rau tus txom nyem no tau hnav. Yog qhov no mas nws thiaj tau mus nyob hauv cov hluav taws.
Kwv tij, nyob hauv peb lub neej muaj coob leej ntau tus txom nyem nyob ncig peb, peb puas qhib qhov muag ntsia kom pom lawv, peb puas qhib siab los hlub lawv? Peb puas ua zoo xws li tus nplua nuj no?
Hnub no peb yuav thov Huab Tais Yes Xus tuaj qhib peb lub siab lub qhov muag, kom peb txhob nco qab txog cov neeg nyob puag ncig peb, thov kom peb muaj ib lub siab hlub khuv leej cov neeg txom nyem peb pom, thov kom peb txawj qee yam peb muaj pub rau lawv. Peb yuav thov Huab Tais Tswv Ntuj tsis txhob cia peb ua neeg siab dub xws li tus nplua nuj hauv lub Moo Zoo hnub no.
Nyob zoo sawv daws.