Zaj nyeem hnub tim 9 lub 8 hli 2023 (Daily reflection)1 aug vdo web

ZAJ NYEEM HNUB TIM 9 LUB 8 HLI, HNUB NCO TXOG LEEJ NTSHIAB TES LES XAS NPES NES DIS TAS NYIAM NTOO CUAM
COV LUS NYOB HAUV MAS TAIS NTAWV MOO ZOO (MT 15: 21-28)

Kwv tij Hmoob sawv daws, lub Moo Zoo hnub no peb hnov Huab Tais Yes Xus hais rau cov thwj tim tias nws yuav tsis pab tus poj niam Kas Nas Has tuaj taij thov kom mus cawm nws tus ntxhais, vim tias tus neeg ntawd tsis yog haiv His Xas Lais.
Kwv tij, lub Koom Txoos twb qhia peb tias Huab Tais Yes Xus yog tus cawm tas lub qab ntuj neeg, ua cas hnub no Huab Tais Yes Xus thiaj hais cov lus zoo li ntawd?
Yog nej nco tau, mas muaj ntau zaus Huab Tais Yes Xus pab cawm cov neeg tsis yog His Xas Lais tsev neeg, xws li tus xab txheeb Los Mas tus tub, tus xab txheeb Los Mas tus tub txib, tus raug dab nyob Nkas Das Las teb.
Kwv tij Hmoob, tos Huab Tais Yes Xus hais zoo li ntawd, vim nws xav sim saib tus poj niam Kas Nas Has ntawd puas muaj lub siab ntseeg lwm tus neeg uas tsis yog nws haiv neeg. Huab Tais Yes Xus thiaj hais rau nws tias “Tsis phim muab me nyuam tej mov pub rau me nyuam dev noj.” 
Tab sis tus poj niam ntawd ntseeg tias Huab Tais Yes Xus muaj hwj huam pab tau nws tus ntxhais, thiab Huab Tais Yes Xus yeej yuav mloog nws cov lus thov, ces nws thiaj hais tias “Huab Tais, yog li koj hais. Tab sis cov me nyuam dev tsuas noj tej tsig mov txeej ntawm lawv tus tswv lub rooj los xwb.”
Kwv tij Hmoob sawv daws, tus poj niam no lo lus mas zoo mloog thiab tsom txog nws lub siab ntseeg tiag tiag. Tus poj niam no lees tias nws tsis tsim nyog yuav tau kev pab ntawm Huab Tais Yes Xus, tab sis vim Huab Tais Yes Xus yog tus tuaj ntawm Tswv Ntuj tuaj, Huab Tais Yes Xus yog Tswv Ntuj Leej Tub, yog neeg tus tswv, mas Huab Tais Yes Xus yeej yuav pab nws vim tias Huab Tais Yes Xus muaj lub siab hlub ntiaj teb neeg sawv daws.
Kwv tij, Huab Tais Yes Xus pom tias tus poj niam no ntseeg li ntawd tiag, ces Huab Tais Yes Xus thiaj hais rau nws tias “Phauj, koj lub siab ntseeg loj kawg. Kom koj tau raws li koj lub siab xav mog!”
Kwv tij Hmoob sawv daws, txhua zaus peb hu txog Tswv Ntuj tuaj pab peb, mas peb puas muaj lub siab ntseeg txog Tswv Ntuj xws li tus poj niam no ntseeg txog Huab Tais Yes Xus? Thaum Tswv Ntuj tsis teb peb cov lus thov, peb ua zoo li cas, peb yws Tswv Ntuj, los peb tseem ua tiag thov Tswv Ntuj tsis tseg? 
Peb yuav tau ntseeg tiag tiag mog, Tswv Ntuj thiaj yuav pub rau peb raws li peb lub siab xav.
Nyob zoo sawv daws.