ZAJ NYEEM NIAJ HNUB. Tim 11 lub 5 hlis 2022 (Daily reflection)

HNUB TIM 11 LUB 5 HLIS, HNUB PLAUB LUB LIS PIAM 4 CAIJ HLA

ยน 12:44-50

Kwv tij Hmoob sawv daws, Ntawv Moo Zoo hnub no qhia peb tias vim Tswv Ntuj xav paub txog tib neeg mas Tswv Ntuj nqes los xeeb ua neeg yog Huab Tais Yes Xus Tswv Ntuj Leej Tub. Yog li tus ntseeg txog Leej Tub thiaj yog nws tab tom ntseeg txog Leej Txiv, tus ntseeg txog Yes Xus ces yog nws ntseeg Tswv Ntuj thiab.

Huab Tais Yes Xus hais ntxiv tias nws tuaj nyob hauv lub qab ntuj yog kom xwv cov neeg ntseeg txog nws tsis txhob nyob hauv qhov tsaus ntuj ntxiv lawm.

Tej zaum nej yuav cav tias ‘yog li ua cas peb thiaj nquag pom cov ntseeg txog Yes Xus raug hiam, raug tsim txom, los yog lawv ua neej pluag txom nyem dua cov tseem coj qub kev cai mas?’

Kwv tij Hmoob sawv daws, lub neej tsaus ntuj Huab Tais Yes Xus hais txog tsis yog lub neej neeg ob luab qhov muag pom los neeg ob txhais tes tuav tau. Tab sis yog lub neej hauv sab ntsuj plig, hauv neeg lub tswv yim.

Li ntawd, cov ntseeg txog Yes Xus txawm lawv ntsib kev txom nyem, raug tseem hwv iab hiam, los lawv yuav ua siab kaj lug yeem txais cov teeb meem ntawd. Lawv lub tswv yim yuav qhib ces lawv yuav pom tias tej teeb meem phem tuaj raug lawv tsuas yog yam pab kom lawv tau txais Tswv Ntuj lub Ceeb Tsheej ua lawv tug xwb. Lawv raug txom nyem sab cev nqaij mas lawv yuav tau kev lom zem nyob hauv sab ntsuj plig, lawv raug txom nyem nyob tiam no, mas yog lawv yuav tau zoo nyob lwm tiam uas yog tiam neeg yuav muaj txoj sia nyob mus li, lawv raug tsim txom nyob hauv lub ntuj no, mas yog Tswv Ntuj yuav so lawv lub kua muag nyob saum Ntuj Ceeb Tsheej.

Kwv tij Hmoob sawv daws, yog li mas peb cov kwv tij txiav siab los txais txoj kev ntseeg txog Yes Xus lawm, mas peb yuav ua neej yam zoo siab xyiv fab mog.

Nyob zoo sawv daws.