ZAJ NYEEM NIAJ HNUB. Tim 12 lub 11 hlis 2022 (Daily reflection)

ZAJ NYEEM HNUB TIM 12 LUB 11 HLIS, HNUB NCO TXOG LEEJ NTSHIAB YOS XAS FAS
COV LUS NYOB HAUV LUS KAS NTAWV MOO ZOO (LK 18: 1-8)

Kwv tij Hmoob sawv daws, lub Moo Zoo hnub no mas Huab Tais Yes Xus tab tom qhia peb tias thaum peb teev Ntuj peb yuav teev li cas. Peb yuav teev Ntuj tsis tseg, yuav txhob ntaus siab yau, thiab yuav tso siab.
Huab Tais Yes Xus hais zaj paj lug txog tus poj ntsuam niaj hnub mus taij thov kev ncaj ncees ntawm tus txwj laus txiav txim, nws tso siab tias muaj ib hnub mas tus txwj laus yuav mloog nws thiab ua raws li nws tau mus taij. Qhov kawg tus txwj laus meem txom ces nws mloog tus poj ntsuam cov lus taij tiag.
Kwv tij Hmoob sawv daws, Huab Tais Yes Xus hais meej tias yog peb tso siab rau Tswv Ntuj tias peb teev Ntuj tsis tseg thiab tsis ntaus siab yau mas muaj ib hnub Tswv Ntuj yuav mloog peb cov lus thov, mas Tswv Ntuj yeej yuav pub rau peb raws li peb kev tso siab ntawd tiag.
Tab sis yog peb xav tias kuv teev Ntuj hnub no, kuv thov kiag mas Tswv Ntuj tsum muab kiag rau kuv, mas yog peb tab tom yuam kev loj, peb yuav tsis tau txais li peb cov lus cev rau Tswv Ntuj. 
Kwv tij Hmoob, peb txhob ntaus siab, peb txhob tag kev cia siab, txhob tub nkeeg teev Ntuj mog, txawm tias hnub no los xyoo no peb tsis tau raws li peb thov, vim tias tsem tsis tau txog zoo caij Tswv Ntuj yuav pub rau peb xwb. Peb kav tsij teev Ntuj, thov Ntuj tas mus li mog! Nyob zoo sawv daws.