ZAJ NYEEM NIAJ HNUB. Tim 13 lub 6 hlis 2022 (Daily reflection)

HNUB TIM 13 LUB 6 HLI 2022, NCO TXOG LEEJ NTSHIAB TUAM NYOB PAS DUAS
COV LUS NYOB HAUV MAS TAIS NTAWV MOO ZOO, ZAJ 5 QIB 38-42 HAIS TIAS…….
MT 5: 38-42
Kwv tij Hmoob, nyob hauv peb haiv Hmoob thiab ntau haiv neeg, mas peb hais tias luag ua phem li cas rau peb, mas peb yuav tsum ua phem li ntawd pauj rov qab rau. Luag tsis nyiam tsis hlub peb, mas peb tsis lam qhuav ntsej ua zoo rau tus ntawd xws li cov Yus Das txoj cai hais tias ‘koj ua dab tsi li cas rau lwm tus, mas cia luag pauj li ntawd rov qab rau koj’ los yog peb hais tias ‘qhov muag pauj qhov muag, kaus hniav pauj kaus hniav’. Mais Xes txoj cai no yog tsa los tswj kom tsoom His Xas Lais txhob ua phem pauj rov rau lwm tus, mas lawv thiaj yuav nyob ua ke tau. 
Hos Huab Tais Yes Xus tuaj qhia ntxiv tias peb yuav tsis txhob sib pauj kua zaub ntsuab rau tus neeg ua phem rau peb, vim kuv pauj koj, koj pauj kuv, pauj mus pauj los ces yuav tsis txawj tas xws li peb cov Hmoob uas muab tej plaub ntug puag txheej thaud los hais hauv rooj tshoob tsis txawj tag.
Huab Tais Yes Xus qhia peb tias yog muaj ib tug ua tsis zoo rau koj, mas koj yuav ua zoo rov rau nws, koj yuav zam rau nws, ces txog qhov kawg, koj qhov zoo yuav pab kom nws xav tau, ces nws yuav txawj ua zoo xws li koj ua rau nws ntawd rau lwm tus.
Yog li mas cov kwv tij, hnub no Huab Tais Yes Xus thiaj ntuas peb tias “Leej twg ib ncuav pias rau koj sab plhu, mas koj tig loo sab tod rau nws thiab, leej twg xav tau koj lub tsho luv, mas koj pub kiag lub tsho ntev rau nws thiab, leej twg thov kom koj pab xa nws mus ib ncuav kev, mas koj xa nws mus kiag ob ncuav kev, leej twg xav thov ntawm koj, mas koj kav tsij pub rau, leej twg xav txais koj li nyiaj, mas koj muab rau nws txais.”
Nyob zoo sawv daws.