ZAJ NYEEM NIAJ HNUB. Tim 15 lub 8 hli 2022 (Daily reflection)

ZAJ NYEEM HNUB TIM 15 LUB 8 HLI, HWM NIAM MAB LIAB MUS SAUM NTUJ
COV LUS NYOB HAUV LUS KAS NTAWV MOO ZOO (LK 1: 39-56)

Kwv tij Hmoob, hnub no lub Koom Txoos ua hmoov hwm niam Mab Liab mus saum Ntuj, mas peb thov muab Vaj Qhia Npes Nes Dis 16 cov lus los piav rau nej mloog. Vaj Qhia Npes Nes Dis 16 hais tias hnub hwm niam Mab Liab mus saum Ntuj pab peb nyob hauv txoj kev ntseeg tau li cas?
1. Hnub hwm niam Mab Liab mus saum Ntuj qhia kom peb paub tias nyob hauv Tswv Ntuj mas muaj ib kem tsev cia tos peb tiag xws li Huab Tais Yes Xus tau hais tseg cia tias ‘nyob hauv kuv Txiv tsev, muaj ntau chav.’
Niam Mab Liab tsis tau mus nyob dua lwm lub sim ceeb, tiam sis yog nyob saum Ntuj. Yog li mas leej twg khaub zig Tswv Ntuj mas nws yim npuab Tswv Ntuj vim Tswv Ntuj nyob ze sawv daws, thiab niam Mab Liab tau mus so nyob hauv Tswv Ntuj lawm, mas niam Mab Liab thiaj nyob ze peb xws li Tswv Ntuj thiab.
Vim niam Mab Liab yog tus tau nyob ze Tswv Ntuj tshaj sawv daws, mas niam Mab Lia blub siab thiaj loj thiab dav txaus rau txhua tsav txhua yam nkag mus nkaum mus so hauv nws lub siab.
2. Tsis yog nyom hauv Tswv Ntuj thiaj muaj ib chav cia tos peb xwb, nyob hauv peb los yeej muaj ib chav cia rau Tswv Ntuj los nyob thiab. Peb pom qhov no tau yog nyob hauv niam Mab Liab lub neej, nws ua lub xab cog lus ntshiab cia rau Tswv Ntuj nyob. Li ntawd mas nyob hauv peb txhua tus thiaj muaj ib chav tseg cia rau Tswv Ntuj.
Li ntawd mas kwv tij Hmoob, peb yuav qhib peb chav no tos Tswv Ntuj tuaj nyob hauv peb, kom Tswv Ntuj thiaj tau ua lub zog rau peb, coj peb mus cuag Tswv Ntuj xws li peb niam Mab Liab mog. Nyob zoo sawv daws.