ZAJ NYEEM NIAJ HNUB. Tim 16 lub 5 hlis 2022 (Daily reflection)

HNUB TIM 16 LUB 5 HLIS, HNUB OB LUB LIS PIAM 5 CAIJ HLA

Kwv tij Hmoob sawv daws, hnub no nej hnov Huab Tais Yes Xus hais ntau zaus
txog ‘tus nyiam Huab Tais Yes Xus’ thiab ‘tus Huab Tais Yes Xus nyiam’.
Huab Tais Yes Xus hais tias “tus nyiam kuv, mas nws muaj kuv cov lus qhia thiab
nws coj rawv kuv cov lus qhia. Kuv thiab kuv txiv yuav nyiam nws thiab.”
Kwv tij Hmoob, Huab Tais Yes Xus cov lus qhia yog dab tsi?
Yog lo lus no “koj yuav muab tas koj lub siab, tas koj tus ntsuj plig, tas koj lub
tswv yim los nyiam koj tus Huab Tais Tswv Ntuj. Koj yuav nyiam tus nyob ze koj
ib yam nkaus li koj nyiam koj.”
Kwv tij Hmoob, peb yuav nyiam Tswv Ntuj tau, mas yog peb tsum nyiam cov
neeg nyob puag ncig peb. Li ntawd, yuav ua cas peb thiaj nyiam cov neeg nyob
puag ncig peb tau?
Kawg yog peb cev tes mus pab cov neeg txom nyem, maj zeeg mus nrhiav tus neeg
raug mob, ntsia lwm tus yam hlub tshua, qhib siab khuv leej luag tej, tsa ncauj hais
lo lus zoo, cuab pob ntseg mloog cov neeg quaj ntsuag lub suab hu.
Cov kwv tij, hnub no mus mas vam tias peb sawv daws yuav pib nyiam cov neeg
hauv peb tsev, tshwj xeeb yog ntxhais vauv yuav nyiam niam tais yawm txiv, tub
nyab yuav nyiam niam pog txiv yawg, kwv tij yuav sib nyiam, viv ncaus yuav sib
hlub.
Thaum muaj kev sib nyiam hauv lub cuab lawm, peb thiaj yuav muaj cuab kav
tawm mus nyiam cov nyob puag ncig tau!
Nyob zoo sawv daws.