ZAJ NYEEM NIAJ HNUB. Tim 16 lub 6 hlis 2022 (Daily reflection)

HNUB TIM 16 LUB 6 HLI, HNUB TSIB LUB LIS PIAM 11 CAIJ NYOB NRUAB XYOOS
COV LUS NYOB HAUV MAS TAIS NTAWV MOO ZOO, ZAJ 6 QIB 7-15 HAIS TIAS

Kwv tij Hmoob sawv daws, nej hnov Huab Tais Yes Xus qhia tias “Yog nej tsis zam txhaum rau luag, mas nej txiv kuj yuav tsis zam rau nej.” Thiab nyob hauv zaj Peb Txiv uas peb niaj hnub hais, mas peb hais tias “Thov koj zam txhaum rau peb, zoo li peb zam rau luag.”
Cov lus no yog ntuas kom peb ras ntsoov tias txhua txhua hnub, peb yuav tau zam txhaum pub rau cov neeg muaj feem nyob hauv peb lub neej, txawm lawv txhob txwm ua los yog tsis tab meeg ua rau peb. Vim tias thaum txog hnub txiav txim mas Tswv Ntuj yuav txiav mus raws li yam peb ua: yog peb zam rau luag ntau, ces Ntuj yuav zam rau peb ntau, yog peb zam tsawg, Ntuj kuj yuav zam tsawg rau peb thiab.
Li ntawd mas cov kwv tij, txhua hnub thaum peb sawv, peb yuav pw, los yog peb yuav ua ib txoj hauj lwm dab tsi, peb yuav hais zaj ‘Peb Txiv’ thiab peb yuav ntuas peb siab kom hnub no peb txawj zam rau lwm tus, thiab xav saib tshuav leej twg uas peb txawm muaj lub siab chim npau taws rau nws, ces peb yuav zam rau nws.
Peb yuav thov Leej Txiv Tswv Ntuj pub lub zog rau peb kom muaj peev xwm zam rau lwm tus mus li mog!