ZAJ NYEEM NIAJ HNUB. Tim 16 lub 8 hli 2022 (Daily reflection)

ZAJ NYEEM HNUB TIM 16 LUB 8 HLI, NCO TXOG LEEJ NTSHIAB TES FAS NOS NYOB HOOS NQIAS
COV LUS NYOB HAUV MAS TAIS NTAWV MOO ZOO (MT 19: 23-30)

Kwv tij Hmoob sawv daws, thaum nej hnov Huab Tais Yes Xus hais tias ib tug neeg nplua nuj yuav ceeb laj nkag mus hauv Ntuj lub Ceeb Tsheej mas nej xav li cas? Thiab yog vim li cas Huab Tais Yes Xus thiaj hais li ntawd? Puas yog Huab Tais Yes Xus tsis nyiam cov neeg nplua nuj? 
Tos Huab Tais Yes Xus hais zoo li ntawd, vim tias nyob rau lub caij ntawd mas cov neeg muaj neeg nplua nuj mas lawv muab lawv lub siab dai duam rau lawv tej cuab tam. Thiab lo lus ‘nplua nuj’ tsis yog hais txog nyiaj txiag xwb, tseem hais txog ‘suab npe’, ‘hwj chim’, ‘kev ntshaw’ thiab. Yog li mas tus neeg twg nws saib tej yam li hais los no loj dua txoj kev nyiam lwm tus, lawv nrhiav tej li hais no ua ntej nrhiav Tswv Ntuj, mas yog nws ceeb laj mus tau hauv Ntuj Ceeb Tsheej. 
Li ntawd mas kwv tij Hmoob, nej txhob xav tias peb yog neeg pluag txom nyem, peb tsis yuav mus nyiam mus hlub lwm tus, peb tsis yuav nrhiav Tswv Ntuj, peb kav tsij ua tiag nrhiav noj yug peb lub plab lub cev xwb, vim Huab Tais Yes Xus tsis tau hais tias cov neeg pluag txom nyem ceeb laj mus tau hauv Ntuj lub Ceeb Tsheej.
Nej txhob xav li no mog!
Txawm nej nplua nuj los pluag, muaj los txom nyem; nej yuav tau xaiv saib dab tsi muaj txiaj ntsim rau nej dua. Nej yuav xaiv saib nej om txoj sia nyob mus li, los nej yuav om ntiaj teb lub cuab tam. Nyob zoo sawv daws.