ZAJ NYEEM NIAJ HNUB. Tim 17 lub 9 hli 2022 (Daily reflection)

ZAJ NYEEM HNUB TIM 17 LUB 9 HLIS, NCO TXOG LEEJ NTSHIAB LOS NPES NPES LAS MIS NOS
COV LUS NYOB HAUV LUS KAS NTAWV MOO ZOO (LK 8: 4-15)

Kwv tij Hmoob sawv daws, zaj paj lug nej tau hnov hauv hnub no mas Huab Tais Yes Xus thwj tau muab txhais rau nej lawm tias lub noob qoob yog dab tsi, cov av tom ntug kev yog dab tsi, cov av saum pob zeb yog dab tsi, cov av muaj pos yog dab tsi, thiab cov av zoo yog dab tsi.
Qhov peb xav ntxiv me ntsis rau nej mas yog qhov no: nej hnov Huab Tais Yes Xus hais zaj paj lug no tas, nej xav ua hom av twg? Puas yog cov av tawv tawv tom ntug kev, los yuav yog cov av aum pob zeb; los nej yuav ua cov av muaj pos tuaj ntom nti, los nej ua cov av zoo?
Yog peb muaj daim teb nplej teb zaub, yog peb kuj siab tu muab siab rau tua tshuaj dob nroj, rau chiv ywg dej, mas peb cov nplej yuav tuaj zoo cov zaub yuav ntom teb, txawm tias yog av pob zeb los tawv. Muab piv rau peb lub siab ces kuj yuav zoo li no thiab. Yog peb xav kom Tswv Ntuj Lo Lus tuaj taus thiab nyob ruaj hauv peb siab mas peb yuav tau nquag nyeem Ntawv Ntshiab, thov Ntuj, teev Ntuj, xav txog tej yam zoo mus li, ua cov hauj lwm zoo raws li Tswv Ntuj hais kom peb ua mog. Nyob zoo sawv daws.