ZAJ NYEEM NIAJ HNUB. Tim 2 lub 11 hli 2022 (Daily reflection)

ZAJ NYEEM HNUB TIM 2 LUB 11 HLI, HNUB THOV NTUJ RAU COV DUA NRA
COV LUS NYOB HAUV MAS TAIS NTAWV MOO ZOO (MT 25: 31-46)

Kwv tij Hmoob sawv daws, nyob hauv peb cov neeg ntseeg Ntuj mas peb hais tias txoj kev tuag tsis yog qhov xaus hauv neeg txoj sia. Tiam sis txoj kev tuag yog lub rooj loog coj mus cuag txoj sia nyob mus li pem Ntuj Ceb Tsheej. Cov thaum ua neej nyob, nws uas raws li Huab Tais Yes Xus lo lus mas peb tso siab tias thaum nws tuag, nws tus ntsuj tus plig yuav tau txoj hmoov zoo, tab sis tus uas nws tsis ua raws li Huab Tais Yes Xus qhia mas nws tus ntsuj tus plig yuav mus rau dab teb, nyob hauv cov hluav taws tsis txawj kug.
Cov kwv tij, peb ntseeg tias peb yog neeg txhaum, peb tus ntsuj plig no ntshiab tsis txaus yuav mus pem Ntuj Ceeb Tsheej, mas Tswv Ntuj thiaj pub lub cib fim rau peb tau mus ntxhuav peb tus ntsuj plig kom ntshiab tso, peb mam nkag mus hauv Ntuj Ceeb Tsheej tau. Qhov chaw peb yuav tau mus ntxuav tus plig mas yog lub teb chaws them txim.
Nyob ntawd, peb tus plig yuav raug hlawv nyob hauv Tswv Ntuj cov hluav taws, peb yuav raug kev txom nyem. Yog li mas Koom Txoos thiaj cia hnub no ua hnub peb yuav sib txoos thov Ntuj rau cov ntsuj plig nyob hauv teb chaws them txim, kom lawv tau txais Ntuj lub txiaj ntsim, kom lawv dim hauv teb chaws them txim kom sai, lawv thiaj yuav tau mus nyob pem Ntuj, muaj ib hnub, lawv yuav nrog tas tsoom neeg thov Ntuj pub rau peb thiab.
Li ntawd mas cov kwv tij Hmoob, hnub no nej yuav nrog tas tsoom ntseeg thov Ntuj pub rau cov neeg dua nra mog. Nyob zoo sawv daws.