ZAJ NYEEM NIAJ HNUB. Tim 20 lub 10 hli 2022 (Daily reflection)

ZAJ NYEEM HNUB TIM 20 LUB 10 HLI, HNUB TSIB LUB LIS PIAM 29 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 12: 49-53)

Kwv tij Hmoob, Huab Tais Yes Xus hais tias “Kuv coj ib co hluav taws tuaj rau lub ntiaj teb, kuv yeej xav kom cov hluav taws ntawd twb cig lawm.” 
Thaum peb txais lub Cim Ntxuav, mas Leej Ntuj Plig Ntshiab los nyob saum peb, Tswv Ntuj cov hluav taws los nyob puv hauv peb siab, hlawv peb lub siab kom kub lug txog txoj hauj lwm tshaj lub Moo Zoo rau lwm tus. 
Kwv tij Hmoob, Huab Tais Yes Xus xav kom cov hluav taws hauv peb cig mus li tsis tuag, mas peb thiaj yuav ua tau txoj hauj lwm tshaj lub Moo Zoo rau lwm tus.
Huab Tais Yes Xus hais ntxiv tias thaum peb ua txoj hauj lwm tshaj lub Moo Zoo, yuav muaj ib co txais lub Moo Zoo thiab ib co yuav tsis kam txais. Thaum ntawd yuav muaj kev sib ncaim. 
Cov kwv tij, peb txhob ntxhov siab tias thaum peb hais txog Ntuj lub Ceeb Tsheej, peb tshaj txog lub Moo Zoo rau peb cov kwv tij, ces peb yog tus ua kom peb cov kwv tij muaj kev sib ncaim muaj lus sib ceg. Qhov ntawd tsis yog tuaj ntawm peb tuaj, tiam sis yog vim lawv kaw lawv lub siab xwb. Peb yuav thov Tswv Ntuj kom maj mam qhib lawv lub siab, peb yuav ua pov thawj txog lub Moo Zoo rau lawv pom, ces muaj ib hnub peb cov hluav taws yuav kis rau lawv ces lawv lub cub tawg yuav cig, lawv yuav txais lub Moo Zoo. 
Tshwj xeeb, mas yog peb txhob pub kom cov hluav taws hauv peb tuag. Nyob zoo sawv daws.