ZAJ NYEEM NIAJ HNUB. Tim 20 lub 9 hli 2022 (Daily reflection)

ZAJ NYEEM HNUB TIM 20 LUB 9 HLIS, NCO TXOG LEEJ NTSHIAB AS NRES KIM, PAJ LUG TSOOS HAS SAS THIAB COV TIM KHAWV KOS LIM
COV LUS NYOB HAUV LUS KAS NTAWV MOO ZOO (LK 8: 19-21)

Kwv tij Hmoob, thaum Mab Liab thiab Huab Tais Yes Xus cov txheeb ze tuaj nrhiav Huab Tais Yes Xus, ua cas Huab Tais Yes Xus thiaj hais tias nws niam thiab nws cov kwv tij yog cov mloog thiab ua raws Tswv Ntuj Lo Lus.
Puas yog Huab Tais Yes Xus tsis lees tias Mab Liab thiab nws cov swm neeg yog nws niam thiab nws cov kwv tij?
Nyob hauv Ntawv Moo Zoo peb paub tias Mab Liab yeem ua raws Tswv Ntuj siab nyiam, thiab Huab Tais Yes Xus ntau tus txheeb ze tau raws nws qab vim lawv mloog Tswv Ntuj Lo Lus. Li ntawd, nyob hauv zaj no thiaj tsis yog txhais tias Huab Tais Yes Xus nrauj nws niam thiab nws cov kwv tij.
Qhov Huab Tais Yes Xus xav qhia mas yog tias thaum peb mloog thiab ua raws Tswv Ntuj Lo Lus ces peb yuav txia ua Huab Tais Yes Xus tus kwv, tus muam, peb txia ua Tswv Ntuj cov me nyuam xws li Huab Tais Yes Xus, peb yuav koom muaj ib leej niam xws li Huab Tais Yes Xus.
Li ntawd mas kwv tij Hmoob sawv daws, thaum peb tig los ntseeg Ntuj, peb ua Yes Xus thwj tim lawm, mas peb tau ua ib cuab, ua ib tsev neeg lawm tiag, tsim nyog peb yuav sib nyiam sib hlub xws li peb koom ib plab mog. Nyob zoo sawv daws.