ZAJ NYEEM NIAJ HNUB. Tim 22 lub 10 hli 2022 (Daily reflection)

ZAJ NYEEM HNUB TIM 22 LUB 10 HLI, NCO TXOG LEEJ NTSHIAB VAJ QHIA ZAM PAJ LUG 2
COV LUS NYOB HAUV LUS KAS NTAWV MOO ZOO (LK 13: 1-9)

Kwv tij Hmoob, Huab Tais Yes Xus zaj paj lug hauv lub Moo Zoo hnub no mas qhia dab tsi rau peb. 
Zaj paj lug hais tias tus tswv teb muaj ib lub vaj txiv cawv, mas nws cog tau ib tsob txiv ncuav pias nyob hauv lub vaj thiab, ces nws niaj xyoo tuaj xyuas saib tsob txiv ncuav pias puas txi txiv, tab sis tuaj lub xyoo twg los tsob txiv ncuav pias tsis txi li, ces tus tswv hais rau tus tub txib tias kom muab ntov pov tseg, tab sis tus tub txib thov tus tswv vaj cia nws tut sob txiv ncuav pia sib xyoos ntxiv saib puas yuav txi los tsis txi tso, mam ntov pov tseg.
Kwv tij Hmoob, Tswv Ntuj tsim peb los nyob hauv lub ntiaj teb no mas yog zoo li peb yog tsob ntoo txiv ncuav pias ntawd, Tswv Ntuj xav kom peb txi txiv pub rau Tswv Ntuj. Tswv Ntuj xa nws Leej Tub tuaj nphoo chiv khawb av ncig tsob ntoo txiv ncuav pias saib tsob ntoo puas txi txiv, saib peb puas hloov siab tshiab.
Dhau ntawd, peb cov neeg ntseeg sawv daws, mas peb muaj ib txoj hauj lwm thiab, peb kuj yog Tswv Ntuj tus tub txib zov Tswv Ntuj lub vaj, peb txoj kab xwm yog khawb av ncig tsob ntoo, nphoo chiv, ywg dej rau tsob ntoo txiv ncuav pias.
Cov kwv tij, Huab Tais Yes Xus hlub peb, tsis xav kom Tswv Ntuj rho peb tawm hauv Ntuj Ceeb Tshee, mas Huab Tais Yes Xus thiaj thov lub sij hawm los tshaj txoj kev cawm neeg, qhia txoj kev mus cuag Ntuj Ceeb Tsheej rau peb. Ntawm peb, mas yog peb hlub cov nyob puag ncig peb, mas peb yuav ua zoo xws li tus tub txib, khawb av, nphoo chiv rau tsob ntoo txiv ncuav pias, qhia lub Moo Zoo, tshaj Ntuj lus rau peb cov kwv tij ib puag ncig, pab lawv kom hloov siab tshiab, kom lawv txi txiv mas qhov kawg lawv thiaj yuav tsis raug ntov pov tseg, lawv txoj sia thiaj yuav tsis raug kev tuag tiam sis lawv yuav tau txoj sia nyob mus li nrog peb nyob saum Ntuj Ceeb Tsheej mog. Nyob zoo sawv daws.